नेपालले ५० औं ओडिआई खेल टियुमा खेल्ने 

काठमाडौं । नेपालले आफ्नो ५० औं एकदिवसीय अन्तराष्ट्रिय(ओडिआई) खेल घरेलु मैदान टियुमा खेल्ने भएको छ । 

एसीसी प्रिमियर कप अन्तर्गत आगामी महिना नेपाल र ओमानबीच आगामी महिना हुने खेलमा नेपालले आफ्नो ५० औं ओडिआई खेल खेल्ने छ । 

सन् २०१८ मार्च १५ मा ओडिआई मान्यता प्राप्त गरेको नेपालले हालसम्म ४९ औं ओडिआई खेलेको छ ।

नेपालको ५० औं ओडिआई खेल टियु मैदानमा वैशाख ८ मा ओमानसँग हुनेछ । नेपालमा आयोजना हुने एसीसी प्रिमियर कप प्रतियोगितामा एकै समूहमा रहेका नेपाल र ओमान ओडिआई मान्यता देश हुन् । त्यसैले उक्त खेल ओडिआई मान्यता हुनेछ । 

नेपालले आफ्नो पहिलो ओडिआई खेल २०१८ अगष्ट १ मा नेदरल्यान्ड्ससँग नेदरल्यान्ड्समा नै खेलेको थियो । दुई खेलको सिरिजमा पहिलो खेलमा पराजित भएको नेपालले दोस्रो खेलमा भने रोमान्चक १ रनको जित हात पारेको थियो । 

नेपालले ४९ ओडिआई खेलमा २६ मा जित, २१ मा हार, एक मा बराबरी र एक खेलमा नतिजा बिहीन छ ।

यसबीचमा नेपालले ७ देशसँग ओडिआई खेल खेलेको छ । नेपालले युएई,पपुवा न्युगिनी(पीएनजी),स्कटल्यान्ड,नामिबिया,ओमान,अमेरिका र नेदरल्यान्ड्ससँग ओडिआई खेल खेलेको छ । 

४९ मध्ये नेपालले आईसीसी विश्वकप लिग टू मा ३६ खेल खेलेको थियो । बाँकी १२ खेल दुई देशिय सिरिजको रुपमा नेदरल्यान्ड्स २ ,युएईसँग ६ र पीएनजीसँग ४ खेल खेलेको थियो । 

एक खेल एसिया कप छनोट प्रतियोगितामा युएईविरुद्ध खेलेको थियो । नेपालले ओडिआई मान्यता प्राप्त सबैभन्दा धेरै खेल युएईसँग १३ र सबैभन्दा कम नेदरल्यान्ड्ससँग २ खेल खेलेको छ ।

नेपालले युएईसँग १३ खेलमा खेलेकोमा ७ मा जित र ६ खेलमा पराजित भएको थियो । पीएनजीसँग नेपालले १० खेलमा खेलेकोमा ८ मा जित र २ मा हार व्यहोरेको थियो ।

नामिबियासँग ६ खेलमा २ मा जित, ३ मा हार र एक खेल वर्षाको कारण नतिजा विहीन बनेको थियो । अमेरिकासँग ६ खेलमा खेलेकोमा ३ मा जित, २ मा हार र एक खेल बराबरी भएको थियो  ।

स्कटल्यान्डसँग ६ खेलमा खेलेकोमा ३ मा जित र ३ मा हार रहेको थियो । ओमानसँग ६ खेलमा खेलेकोमा २ मा जित र ४ मा हार व्यहारेको थियो । नेदरल्यान्ड्ससँग दुई खेल खेल्दा समान एक मा जित र एकमा हार व्यहोरेको थियो । 

यस बीचमा नेपालले पपुवा न्युगिनी र युएईसँग समान २२ सिरिज खेलेको छ । नेपालले २०१९ मा युएईलाई उसकै भूमिका तीन खेलको सिरिज २–१ ले हराएको थियो । २०२२ मा घरेलु मैदानमा नेपालले युएईलाई २–१ ले हराएको थियो । २०१८ मा नेपालले युएईसँग एसिया कप छनोटमा खेलेको एक खेलमा नेपालले हार व्यहोरेको थियो ।

पीएनजीसँग नेपालले २०२१ मा ओमानमा दुई खेलको सिरिज क्लिनस्विप गरेको थियो । २०२२ मा नेपालमा नै भएको दुई खेलको ओडिआई सिरिजमा पीएनजीले क्लिन स्विप गरेको थियो । 

नेपालले आफ्नो ४९ औं ओडिआई खेल भने युएईको विरुद्धमा खेलेको थियो ।