काठमाडौं । नामिबियामा जारी रहेको आईसीसी विश्वकप छनोट प्लेअफ प्रतियोगितामा पपुवा न्यु गिनी(पीएनजी)ले लगातार दोस्रो हार व्यहोर्दा घरेलु टोलीले पहिलो जित हात पारेको छ ।
नामिबियाको विन्डोकमा रहेको युनाईटेड मैदानमा भएको खेलमा घरेलु टोलीले पीएनजीलाई ४८ रनले पराजित गरेको हो ।
नामिबियाले दिएको ३ सय ८२ रनको लक्ष्य पछ्याएको पीएनजीले ४६ ओभर २ बलमा अलआउट भएर ३ सय ३३ रन मात्र बनायो ।
पीएनजीका लागि चाल्र्स अमिनीले ७४ बलमा १ सय ९ रनको शतकीय ईनिङ खेले । उनले ८ चौका तथा ८ छक्का प्रहार गरे ।
सेसे बाउ र कप्तान असद भालाले अर्धशतकीय ईनिङ खेले । बाउले ४४ बलमा ५४ तथा भालाले ६१ बलमा ५७ रन बनाए ।
नामिबियाका लागि रुबेन ट्रम्पलम्यान र बेर्नहार्ड स्कोल्टर्जले समान ३/३ विकेट लिए ।
त्यसअघि टस हारेर पहिला ब्याटिङ गरेको नामिबियाले ५० ओभरमा ८ विकेट गुमाएर ३ सय ८१ रन बनायो ।
नामिबियाका लागि कप्तान ग्रेहार्ड इरास्मसले १ सय १३ बलमा १ सय २५ रनको शतकीय ईनिङ खेले । उनले ११ चौका र ५ छक्का प्रहार गरे ।
निकोलास डेविन र जान निकोलले अर्धशतकीय ईनिङ खेले । डेविनले ७९ बलमा ९० रन बनाए । निकोलले ५९ बलमा ६१ रन बनाए । पिंकि जान फ्रान्सले १४ र जान ग्रिन ३२ रन बनाए ।
पीएनजीका लागि सिमो कमियले ५ तथा कबुआ मोरियाले २ विकेट लिए । कमियले १० ओभरमा ६८ दिएर रन ५ विकेट लिएका थिए ।
पहिलो जित निकालेको नामिबिया २ खेलमा २ अंकका साथ चौथो स्थानमा रहेको छ । लगातार दोस्रो हार व्यहोरेको पीएनजी भने अंकबिहिन रहँदै पुछारमा रहेको छ ।
प्रतियोगितामा ६ टोलीको सहभागीता रहेको छ । प्लेअफमा आईसीसी विश्वकप लिग टू का पुछारका चार टोलीसँगै आईसीसी विश्वकप च्यालेन्ज लिग ए र बी का विजेता राष्ट्रहरुको सहभागीता रहेको छ ।
लिग टू मा नामिबिया चौथो, अमेरिका पाँचौं, युएई छैटौं र पपुवा न्युगिनी पुछारमा रहँदै प्लेअफमा रहेका छन् । प्लेअफमा च्यालेन्ज लिग ए र बी का विजेता जर्सी र क्यानडा पनि रहेका छन् ।
सिंगल राउन्ड रोविनको आधारमा हुने प्रतियोगितामा शीर्ष दुई टोलीले जिम्बावेमा हुने विश्वकप छनोट खेल्न पाउनेछन् । विश्वकप छनोट खेलका लागि नेपाल भने छनोट भईसकेको छ ।
त्यस्तै पुछारका दुई टोली युएई र पीएनजीले भने प्लेअफमार्फत एकदिवसीय अन्तराष्ट्रिय मान्यता जोगाउनु पर्नेछ ।
प्लेअफ प्रतियोगिताका सबै खेल एकदिवसीय अन्तराष्ट्रिय मान्यता प्राप्त हुनेछन् ।
प्लेअफमा अमेरिका र नामिबियाले जुनसुकै स्थान हासिल गरेपनि एकदिवसीय अन्तराष्ट्रिय मान्यता जोगाइसकेका छन्।
युएई र पीएनजीले एकदिवसीय अन्तराष्ट्रिय मान्यता जोगाउन भने क्यानडा र जर्सीभन्दा माथि रहेर प्लेअफको अन्त्य गर्नुपर्ने हुन्छ ।
