टिम ब्यालेन्स छ - मुख्य प्रशिक्षक टमटा

काठमाडौं । नेपाली यू-१९ राष्ट्रिय क्रिकेट टोलीका मुख्य प्रशिक्षक जगत टमाटाले अहिलेको टोली ब्यालेन्स रहेको बताएका छन् । 

आईसीसी यू-१९ पुरुष विश्वकपको एसिया छनोट खेल्न यूएई जानु अघि बिदाइ कार्यक्रम पछिको कुराकानीमा मुख्य प्रशिक्षक टमाटाले टोलीका हरेक सदस्य फिट रहेका र टोली ब्यालेन्स रहेको बताएका छन् ।

'सर्वप्रथम त हामी सबै नेपालीलाई बधाई छ जुन की सिनियर टोलीले ब्याक टु ब्याक चार वटा खेल जितेको छ । यसबाट हाम्रो टोलीका केटाहरु पनि उत्साहित भएका छन् । हामीले ५५/६० दिनको क्याम्पमा रह्यौ अभ्यास खेलका रुपमा सिनियर टोलीसँग पनि ६/७ म्याच खेल्यौ । सिनियर टिमलाई पनि म धन्यवाद भन्न चाहान्छु हामीसँग खेलिदिनु भएकोमा । टिम ब्यालेन्समा रहेको छ । केटाहरुमा केही गर्नुपर्छ भन्ने भावना रहेको छ ।' टमाटाले भने 'हामीमा एउटा गोल छ कि यो छनोट जितेर विश्वकप खेल्नुछ भनेर । समग्रमा हाम्रो टोली एभ्रेज छ । सिनियर टिमबाट खेलिसकेको देव हाम्रो कप्तान छ ।आफ्नो प्रदेश र जिल्लाबाट राम्रो प्रदर्शन गरिरहेका केटाहरु हामीसँग छन् । फास्ट बलिङमा हामी अलि राम्रो नै छौ । अरु पक्षमा पनि हामी बलियो नै रहेका छौ ।'

देवले सिनियर राष्ट्रिय टिमबाट पाएको अनुभव यहाँ देखाउने टमाटाको विश्वास रहेको छ । विश्वकपमा छनोट हुनेमा विश्वस्त रहेको टमाटा बताउछन् । जसरी हाम्रा केटाहरुले सिनियर टिमको विरुद्ध राम्रो खेल देखाए त्यसगर्दा यस प्रतियोगितामा राम्रो प्रदर्शन हुने टमाटाको विश्वास रहेको छ ।

'सबै खेलहरु हाम्रा लागि महत्वपूर्ण रहेको छ । यो हैन की यूएई भन्ने कुरा छैन । एक एक म्याच गरेर जित्ने हो । र टिमलाई चै विश्वकपमा छनोट गराउने हो । बाहिर गएर अभ्यास गर्ने भन्दा पनि हामीले सिनियर टिमसँग खेल्यौ । देशका लागि ७/८ बर्ष देखी खेलिरहेका प्लेयरसँग खेल्न पाएका छौं ।' उनले भने 'गुलशन हाम्रा लागि महत्वपूर्ण खेलाडी हुन् तर हामीलाई एकदिवसीय अन्तराष्ट्रिय मान्यता पनि जोगानु छ यता विश्कप पनि खेल्नु छ । अहिलेको स्थितिमा सिनियर टोलीको खेल महत्वपुर्ण रहेकाले उनी त्यता गएका हुन् ।गुलशन जाँदा टिमको ब्यालेन्स त अलिकति खस्किएला तर टिम ब्यालेन्स नै छ ।'