पीएसजीको पहिलो हार

काठमाडौं । फ्रेन्च लिग वान फुटबलमा शीर्ष स्थानको पेरिस सेन्ट जर्मेन (पीएसजी) पराजित भएको छ ।

आइतबार राति भएको खेलमा पीएसजीलाई लेन्सले ३-१ गोल अन्तरले हराएको हो ।

लेन्सको जितमा प्रेजीमाइस्ल फ्रान्कोव्स्कीले पाँचौं मिनेटमा गोल गर्दै सुरुआती अग्रता दिलाएका थिए ।

खेलको आठौं मिनेटमा हुगो एकिटिकेले गोल गर्दै पीएसजीलाई १-१ गोलको बराबरीमा ल्याए ।

२८ औं मिनेटमा लोइस ओपेन्डाले गोल गर्दै लेन्सलाई २-१ को अग्रता दिलाए ।

त्यसपछि खेलको ४७ औं मिनेटमा एलेक्सिस माउरिसीले गोल गर्दै लेन्सलाई ३-१ को जित दिलाए ।

यस जितसँगै लेन्सले १७ खेलमा ४० अंक जोडेको छ ।

लेन्स दोस्रो स्थानमा रहेको छ ।

पीएसजी ४४ अंक जोडेर शीर्ष स्थानमा यथावत रहेको छ ।

पीएसजीको यो सिजनको पहिलो हार हो ।