बेशीसहर । लमजुङ जिल्लाको बेसीसहरमा मंगलबार ३० औं संस्करणको त्रिवेणी कप फुटबल प्रतियोगिताको उद्घाटन भएको छ ।
विविध संस्कृतिक कार्यक्रम र मैत्रीपूर्ण खेलसँगै प्रतियोगिताको औपचारिक उद्घाटन भएको हो ।
प्रमुख अतिथि तथा गण्डकी प्रदेशका प्रदेश सभा सदस्य माननीय भेष बहादुर पौडेलको उपस्थितिमा प्रतियोगिताको औपचारिक उद्घाटन गरिएको त्रिवेणी युवा क्लबका अध्यक्ष विनोद गुरुङले जानकारी गराए।
उद्घाटनको अवसरमा आयोजित मैत्रीपूर्ण खेलमा त्रिवेणी युथ क्लबले श्री चण्डीप्रसाद गणलाई ६-१ गोलको अन्तरले पराजित गर्दै एउटा खसी प्राप्त गरेको छ ।
अध्यक्ष गुरुङका अनुसार प्रतियोगिताको खेलहरु भने बुधबारबाट सुरु हुनेछ ।
प्रतियोगिताको पहिलो खेलमा त्रिवेणी युवा क्लब लमजुङ र बि.वाई.सी, भोटेवोडारबीच प्रतिस्पर्धा हुनेछ ।
त्यस्तै दोस्रो खेलमा एल.एम.वाई.सी, बेशीशहरले रोड्स, रामपुरको सामना गर्नेछ ।
प्रतियोगिताको विजेताले ५ लाख र उपविजेताले ३ लाख पाउने आयोजक त्रिवेणी युवा क्लबले जनाएको छ ।
यस्तै सेमिफाइनलमा पराजित टोलीले ५०/५० हजार पाउने छन् ।
सर्वाधिक गोलकर्ता र सर्वोत्कृष्ट खेलाडीले जनही १५ हजार पाउने छन् ।
