स्पेनको क्लब कासेरेन्योको टोली नेपालमा

काठमाडौं । नेपालमा दुई मैत्रीपूर्ण खेल खेल्नका लागि स्पेनिस फुटबल टिम कासेरेन्यो सिपीको टोली नेपाल आईपुगेका छन् ।

स्पेनको दोस्रो डिभिजन क्लब कासेरेन्योको ५० सदस्यीय नेपाली टोली मंगलबार नेपाल आईपुगेका हुन् ।

कासेरेन्योको टोली त्रिभुवन अन्तराष्ट्रिय विमानस्थलबाट सिधै पोखरा पुगेका छन् ।
 
स्पेनिस टोलीले पोखरा र काठमाडौंमा स्थानीय टिमसँग एक÷एक मैत्रीपूर्ण खेल खेल्ने कार्यक्रम रहेको छ ।

स्पेनस्थित नेपाली राजदुतावास, अखिल नेपाल फुटबल संघ, काठमाडौं जिल्ला फुटबल संघ र कास्की जिल्ला फुटबल संघको सहकार्यमा लुम्बिनी गार्डेन फाउन्डेसनले कासेरेन्योको नेपाल भ्रमण आयोजना गरेको हो ।

‘शान्तिका लागि फुटबल’को नाराका शाथ नेपालबाट सम्पूर्ण विश्वलाई शान्तिको सन्देश प्रवाह गर्ने उद्देश्यमा हुन लागेको मैत्रीपूर्ण भ्रमणमा कासेरेन्योले गण्डकी ११ र काठमाडौं ११ सँग दुई मैत्रीपूर्ण खेल खेल्नेछ ।

नेपाली राष्ट्रिय फुटबल टिमका पूर्व कप्तान अनिल गुरुङ कप्तानीमा रहने गण्डकी ११ को प्रशिक्षणको जिम्मेवारी राजेन्द्र तामाङले पाएका छन् । टोलीमा प्रदेशका अन्य राष्ट्रिय खेलाडीहरुको उपस्थिती रहने बताइएको छ ।

यसैगरी काठमाडौं ११ को टिम राष्ट्रिय टोलीका अर्का पूर्व कप्तान विराज महर्जनको नेतृत्वमा रहनेछ । काठमाडौं टोलीको प्रशिक्षक मेघराज केसी हुनेछन् भने टिममा काठमाडौंमा रहेका अन्य राष्ट्रिय खेलाडीहरु समावेश छन् ।

कासेरेन्योले बुधबार पोखरा रंगशालामा गण्डकी ११ तथा बिहीबार दशरथ रंगशालामा काठमाडौं ११ सँग मैत्रीपूर्ण खेल खेल्ने तालिका छ ।