एन्फा र क्लबलाई अन्जनको प्रश्न - यसरी देशको फुटबल कहाँ पुग्छ ?

काठमाडौं । नेपाली राष्ट्रिय फुटबल टिमका सदस्य अन्जन विष्टले अन्योलमा रहेको आसन्न सहिद स्मारक 'ए' डिभिजन लिगबारे अखिल नेपाल फुटबल संघ (एन्फा) र क्लबलाई प्रश्न गरेका छन् ।

राष्ट्रिय टिमका फरवार्ड अन्जनले शुक्रबार सामाजिक संजाल फेसबुकबाट एन्फा र क्लबलाई प्रश्न गरेका छन् ।

फुटबललाई सबथोक मानेर हिडेका खेलाडी फुटबल खेल्नबाट बन्चित भएको बताउँदै अन्जनले यसरी देशको फुटबल कहाँ पुग्छ भनेर प्रश्न गरेका छन् ।

उनले एन्फाको अनुदानले मात्र क्लबको चलेको हो भन्दै क्लबलाई समेत प्रश्न गरेका छन् ।

उनले एक अर्कालाई दोष लगाएर कहिलेसम्म लिग सार्नुहुन्छ भन्दै  प्रश्न गरेका छन् ।

एन्फाले शीर्ष डिभिजन लिग पुस २६ गतेबाट सञ्चालन गर्ने निर्णय गरेको थियो । तर, लिगको तयारीको विषयमा पछिल्लो समय एन्फासँग ए डिभिजनका क्लबहरुले असन्तुष्टि जनाउदै आएका छन् ।

एन्फा र क्लबबीच लिगबारे निर्णय गर्न आगामी बिहीबार बैठक बस्दैछ ।

अन्जनको स्टाटस -

नेपाल जस्तो सुन्दर देशमा जन्मन पाउनु गर्वको कुरा हो । फुटबललाई मनबाट माया गर्ने लाखौ समर्थक भएको देशमा एक फुटबल खेलाडी हुन पाउदा पनि निकै खुसी लाग्छ ।

तर.......

अवस्था फेरिएको छ, म जस्तो फुटबललाई नै आफ्नो सबथोक मानेर हिडेको खेलाडी फुटबल नै खेल्न बन्चित हुदा समेत हाम्रो अभिभावक एन्फा किन यस्तो ढिलासुस्ति गर्दै हुनुहुन्छ? लिग तपाईहरूले गर्ने हो की कस्ले? पटक पटक लिग सार्दा तपाईहरुलाई खेलाडीहरुको चिन्ता लाग्दैन? अझै धेरै खेलाडीहरू विदेशिएको देख्न चाहानुहुन्छ?

प्रिय ए डिभिजन क्लबहरू तपाईहरू कहिले हुनुहुन्छ तयार?लिग खेल्न केही क्लब तयार नभएको सुन्छु, आर्थिक भार बढ्छ रे, एन्फाले समयमा नै पैसा उपलब्ध नगराएकोमा। तपाईंहरुको मेहेनत बिना एन्फाको अनुदानमा मात्रै आजसम्म नेपाली फुटबलमा तपाईंहरुले आफ्नो क्लबको ईतिहास राख्नु भएको त पक्कै होइन होला? हजुरहरुको आवश्यकता र चिन्ता प्रती हाम्रो पनि सम्मान रहेको छ तर हिजो देखी आजसम्मको नेपाली घरेलु फुटबलको ईतिहासलाई पनि फर्केर हेर्नुस् त नेपालमा कती पटक लिग रोकियो क्लब र एन्फाको लफडामा? कति खेलाडिहरु पलायन भए उक्त समयमा लेखजोखा छ एन्फा र क्लबसँग? खेलाडिको जीवन चाँही जीवन होइन? खेलाडीलाई परेको आर्थिक भार कसले बुझ्ने? हुन पनि बिचरा हामी खेलाडीले के नै गर्न सक्छौ त्यही आवाज उठाउछन्, त्यो नी कसले पो सुन्छ र!

यसरी पनि देशको फुटबलको स्तर बढ्छ र?

एन्फा का पदाधिकारीज्यूहरू, ए डिभिजन क्लबहरु, यसरी हाम्रो देशको फुटबल कॅहा पुग्छ?

नेपाली फुटबल र नेपाली खेलाडीको नी माया गर्नुस, आखिर कहिले सम्म एकले अर्कोलाई दोष लगाउदै लिग लाई पर पर धकाल्नु हुन्छ? खेलाडिहरुको रगत पसिनामा कहिलेसम्म तपाईंहरु स्वार्थपुर्ति गर्नुहुन्छ?