पोखरा । २२ औं संस्करणको आहा ! रारा पोखरा गोल्डकप फुटबल प्रतियोगिताको खेल तालिका सार्वजनिक भएको छ ।
आयोजक सहारा क्लब पोखराले बिहीबार प्रतियोगिताको खेल तालिका सार्वजनिक गरेको हो ।
प्रतियोगिताको उद्घाटन खेलमा आयोजक सहारा क्लब र धरान एफसीबीच प्रतिस्पर्धा हुनेछ ।
प्रतियोगिता पुस १४ गते देखि २३ गतेसम्म संचालन हुनेछ ।
प्रतियोगितामा १० टोलीको सहभागिता रहेको छ ।
यस संस्करणमा साविक विजेता नेपाल एपीएफ क्लब, त्रिभुवन आर्मी फुटबल क्लब, सहारा क्लब पोखरा, नेपाल पुलिस फुटबल क्लब, मनाङ मर्स्याङ्दी क्लब, मछिन्द्र क्लब, चर्च ब्वाइज युनाइटेड फुटबल क्लब, बीवाईएससी युएसए, संकटा क्लब र धरान फुटबल क्लबले सहभागिता जनाउने छन् ।
यस पटक पुरस्कार राशिमा वृद्धि गरिएको छ । यस पटकको विजेताले १२ लाख पाउने छन् । यस पटक २ लाख वृद्धि गरिएको हो ।
यस्तै दोस्रो हुने टोलीको पुरस्कारमा १ लाख वृद्धि गर्दै ६ लाख दिईने आयोजकले जनाएको छ ।
