यू-२० महिला टिमको खेलाडी छनोट पुस १० गते  

काठमाडौं । यू-२० राष्ट्रिय महिला फुटबल टिम निर्माणका लागि खेलाडी छनोट पुस १० गते आयोजना हुने भएको छ ।

अखिल नेपाल फुटबल संघ (एन्फा) ले एन्फासँग आबद्द ४८ जिल्लालाई पत्र लेख्दै यू-२० महिला टिमको छनोट पुस १० गते आइतबार हुने जनाएको छ ।

एन्फाले छनोटमा सहभागिता गराउन जिल्लाका खेलाडीलाई पठाउन आग्रह गरेको छ । छनोट एन्फा कम्प्लेक्समा हुनेछ ।

बंगलादेशमा आयोजना हुने साफ यू-२० महिला च्याम्पियनसिपका लागि एन्फाले खेलाडी छनोट गर्न लागेको हो ।

एन्फाले यम गुरुङलाई यू-२० महिला टिमको मुख्य प्रशिक्षक नियुक्त गरिसकेको छ ।

ढाकामा आयोजना हुने च्याम्पियनसिप २०२३ को फेब्रुअरी ३ देखि ९ सम्म आयोजना हुनेछ ।

प्रतियोगितामा नेपाल, आयोजक बंगलादेश, भारत र भुटानको सहभागिता रहेको छ ।

राउण्ड रोबिनको आधारमा हुने प्रतियोगिताको शीर्ष दुई टोलीले उपाधिका लागि प्रतिस्पर्धा गर्ने छन् ।

नेपालले प्रतियोगिताको पहिलो खेलमा आयोजक बंगलादेशसँग खेल्नेछ । खेल फेब्रुअरी ३ मा हुनेछ ।

यस्तै नेपालले फेब्रुअरी ५ मा भुटान र फेब्रुअरी ७ मा भारतसँग खेल्नेछ ।