काठमाडौं । नेपाल र पाकिस्तानबीचको मैत्रीपूर्ण खेल हेर्ने एक जना दर्शकले कतारमा आयोजना हुने विश्वकप अन्तर्गत ब्राजिल र क्यामरुनबीचको खेल हेर्ने मौका पाएका छन्।
अखिल नेपाल फुटबल संघ (एन्फा) ले बिहीबार आयोजना गरेको लक्की ड्र मार्फत ११२०० नम्बरका टिकटबाहकले विश्वकप हेर्ने मौका पाएका हुन् । एन्फाले उक्त नम्बरको टिकट बाहकलाई सम्पर्कमा आउन आग्रह गरेको छ ।
त्रिपुरेश्वरस्थित रंगशालामा बुधबार भएको नेपाल र पाकिस्तानबीचको मैत्रीपूर्ण खेलमा ६ हजार ९ सय ७२ जनाको उपस्थिति रहेको थियो ।
कतार विश्वकप नोभेम्बर २० बाट सुरु हुनेछ ।
ब्राजिल र क्यामरुनबीचको खेल मंसिर १६ गते हुनेछ ।
