दीपेन्द्रको शतकमा आर्मीलाई ३०५ रनको लक्ष्य
काठमाडौं । पीएम कप एकदिवसीय राष्ट्रिय पुरुष क्रिकेट प्रतियोगिताको दोस्रो सेमिफाइनलमा नेपाल पुलिस क्लबले त्रिभुवन आर्मी क्लबलाई जितका लागि ३ सय ५ रनको लक्ष्य दिएको छ ।
कीर्तिपुरस्थित टियु क्रिकेट मैदानमा टस हारेर पहिले ब्याटिङ गरेको पुलिसले ५० ओभरमा ४ विकेट गुमाएर ३ सय ४ रन बनायो ।
पुलिसका लागि कप्तान दीपेन्द्र सिंह ऐरीले शतकीय इनिङ खेले ।
दीपेन्द्रले १ सय ४० रन बनाए । उनले १ सय २५ बलमा ११ चौका र ५ छक्का प्रहार गरे ।
यस्तै आरिफ शेखले अविजित रहदै ९१ रनको अर्धशतकीय इनिङ खेले ।
करण केसी ८ रनमा अविजित रहे ।
कुशल भुर्तेल ३१, सुनिल धमला १३ र अमित श्रेष्ठ १० रनमा आउट भए ।
आर्मीका बिक्रम सोबले ३ विकेट लिए । सुशन भारीको नाममा १ विकेट रह्यो ।
आज दुबै टोली जित निकाल्दै फाइनल पुग्ने योजनामा रहेका छन् ।
यस खेलको विजेताले फाइनलमा एपीएफ क्लबको सामना गर्ने छ ।
एपीएफ क्लब पहिलो सेमिफाइनलमा बिहीबार मधेश प्रदेशलाई पराजित गरेर फाइनलमा प्रवेश गरिसकेको छ।
प्रतियोगिताको विजेताले १० लाख नगद पुरस्कार पाउने छन्। यस्तै उपविजेताले ५ लाख पाउने छन् ।
त्यस्तै उत्कृष्ट खेलाडीले ५० हजार, उत्कृष्ट बलर र ब्याट्सम्यानले २० हजार तथा इमर्जिङ प्लेयरले १० हजार पाउने छन्।
