नवौं राष्ट्रिय : पुरुष भलिबलको क्वाटरफाईनल समिकरण पूरा

पोखरा । नवौं राष्ट्रिय खेलकुद प्रतियोगिता अन्तर्गत पुरुष भलिबलमा सुदरपश्चिम प्रदेश समूह 'सी' को उपबिजेता बन्दै क्वाटरफाईनलमा प्रवेश गरेको छ ।

दोस्रो खेलमा पहिलो जित निकाल्ने क्रममा सुदुरपश्चिम प्रदेशले एनआरएनए स्पोर्टस् एकेडेमीलाई पराजित गरेको हो । सोमबार पोखरा रंगशालास्थित कोर्टमा भएको खेल सुदुरपश्चिमले ३–० को सोझो सेटमा विजयी भएको हो ।

पहिलो सेट २५–९ ले आफ्नो पक्षमा पारेको सुदुरपश्चिमले दोस्रो सेट २५-२० ले जितेको थियो । तेस्रो सेट २५-१३ ले जित हात पारेर सुदुरपश्चिमले अन्तिम आठमा आफ्नो स्थान पक्का गरेको हो ।

यस समूहबाट समूह बिजेताको रुपमा नेपाल एपीएफ क्लब क्वाटरफाईनल पुगिसकेको छ । लिग कम नकआउटको आधारमा भईरहेको प्रतियोगितामा सुदुरपश्चिमले पहिलो जितसँगै ३ अंक जोडेको छ ।

सहभागी ११ टिमलाई चार समूहमा विभाजन गरिएको थियो । आज समूह चरणको खेल सकिएसँगै क्वाटरफाईनल समिकरण पनि पूरा भएको छ ।

समूह 'ए' बाट नेपाल पुलिस क्लब र लुम्बिनी प्रदेश, समूह ‘बी’ बाट त्रिभुवन आर्मी, प्रदेश १ , समूह ‘सी’ मा नेपाल एपीएफ क्लब र सुदूरपश्चिम प्रदेश तथा समूह ‘डी’ मा गण्डकी र वाग्मती प्रदेश क्वाटरफाईनल पुगेका छन् ।