जितबाट छनोटको अन्त्य गर्न चाहन्छौ - मुख्य प्रशिक्षक उर्जन  

काठमाडौं । भियतनाममा जारी एएफसी यू-१७ एसियन कप छनोट अन्तर्गत समूह चरणको अन्तिम खेलमा नेपालले आज आइतबार चाइनिज ताइपेविरुद्ध प्रतिस्पर्धा गर्दैछ ।

फु थोस्थित भियत त्रि स्टेडियममा नेपालले ताइपेको सामना गर्नेछ ।  खेल नेपाली समय अनुसार दिउँसो २:४५ बजे सुरु हुनेछ ।

ताइपेविरुद्ध मैदान उत्रदा नेपाल सान्त्वना जितको खोजीमा हुनेछ । ताइपेलाई हराएर नेपाल छनोटको सुखद अन्त्य गर्न चाहन्छ  ।

'पछिल्लो दुई खेलका सबै टोलीको प्रदर्शनको कुरा गर्ने हो भने नेपाल र चाइनिज ताइपे समान स्तरमा छन् । फरक भनेको उनीहरूले गोल गरेका छन् ।  जुन हामीले गर्न सकेनौँ । त्यसैले आज हाम्रो मुख्य लक्ष्य जित हो । हामी यो छनोट जितका साथ समाप्त गर्न चाहन्छौं।'

समूह 'एफ' मा रहेको नेपाल र ताइपे अंक विहीन छन् । दुबै टोली प्रतियोगिताबाट बाहिरिसकेका छन् ।

प्रशिक्षक श्रेष्ठले छनोट प्रतियोगिताबाट धेरै कुरा सिकेको बताए ।

'हामीले विपक्षीबाट धेरै कुरा सिकेका छौं। म प्रशिक्षकको रूपमा र टोलीको रूपमा हामीले धेरै लामो यात्रा गर्न बाँकी छ। हामीले सिक्नुपर्ने धेरै कुराहरू छन्,' उनले भने ।

 नेपाल पहिलो खेलमा थाइल्याण्डसँग ३-० गोल अन्तरले पराजित भएको थियो । खेलमा आयोजक भियतनामसँग ५-० गोल अन्तरले पराजित भएको थियो ।

नेपाल समूहको पुछारमा रहेको छ । ताइपे तेस्रो स्थानमा रहेको छ । ताइपे पनि भियतनाम र थाइल्याण्डसँग पराजित भएको थियो ।