नेपाली राष्ट्रिय फुटसल टोलीसंग एएफसी फुटसल पदाधिकारीको भेट

काठमाडौं । एसियन फुटबल कन्फेडेरेसन (एएफसी) अन्तर्गत फुटसल कमिटिका पदाधिकारीले नेपाली राष्ट्रिय फुटसल टोलीसंग भेट गरेका छन् । राजधानीको ढुकु फुटसल हबमा आइतबार एएफसीका पदाधिकारीले नेपाली टोलीलाई भेटेका हुन् ।

एएफसी ग्रासरुट फुटसल फेस्टिभलका लागि नेपाल आएका एएफसीका फुटसल समितिका टेक्निकल हेड अली तार्घोलिजादेह र सिनियर डेभलपमेन्ट अफिसर ज्याकोब बिग्सले नेपाली टोलीलाई भेटेका हुन् । एन्फाको फुटसल समितिले गत शुक्रबार एएफसी ग्रासरुट फुटसल फेस्टिभल आयोजना गरेको थियो ।

नेपाली टोलीसंगको भेटमा फुटसल समितिका टेक्निकल हेड तार्घोलिजादेहले नेपाली टोलीलाई फुटसलका नयाँ नियमहरु तथा नेपाली टोलीलाई हौसला दिएका थिए । यस्तै एएफसीका पदाधिकारीले नेपाली टोलीका दुई टोलीबीचको मैत्रीपूर्ण खेल हेरेका थिए ।

अन्तरक्रियाअघि एएफसीका प्रतिनिधि र नेपाली फुटसल समिति सम्मिलित टिमले नेपाल खेलकुद पत्रकार मन्च (एनएसजेएफ) को टिमसंग मैत्रीपूर्ण फुटसल खेलेका थिए ।

कार्यक्रममा अखिल नेपाल फुटबल संघ एन्फाको फुटसल समितिका संयोजक दावा लामा, अन्तर्राष्ट्रिय सम्बन्ध संयोजक नविन पाण्डे लगायत फुटसल कमिटिका पदाधिकारीहरुको उपस्थिति रहेको थियो ।