समग्रमा टिमको प्रदर्शन राम्रो रह्यो - मुख्य प्रशिक्षक उर्जन

काठमाडौं । नेपाली यू-१७ राष्ट्रिय फुटबल टिमका मुख्य प्रशिक्षक उर्जन श्रेष्ठले एएफसी यू-१७ एसियन कप छनोटमा थाइल्याण्डविरुद्ध टिमको प्रदर्शन राम्रो रहेको बताएका छन् ।

भियतनामको फु थोस्थित भियत त्रि स्टेडियममा बुधबार भएको खेलमा नेपाल बलियो टोली थाइल्याण्डसँग ३-० गोल अन्तरले पराजित भएको थियो ।

पहिलो खेलमा हारको बाबजुत उर्जनले केहि गल्तीको कारण गोल खाएको तर प्रदर्शन राम्रो भएको बताए ।

'समग्रमा प्रदर्शन राम्रो छ । पहिलो हाफमा हामीले एउटा गल्ती गर्यौं र गोल खायौं । गोलकिपरले साधारण बल क्लियर गर्न असफल भयो । दोस्रो हाफमा हामी लयमा रहन सकेनौं । किनभने हामी खेलमा फर्किन चाहन्थ्यौं । गोल फर्काउन चाहन्थ्यौं,' खेलपछि उनले भने ।

प्रशिक्षक उर्जनले आगामी खेलमा गल्तिहरु सुधार गर्ने बताए ।

'हामी अर्को खेलमा गल्तीहरू कम गर्ने प्रयास गर्नेछौं,' उनले भने ।

प्रशिक्षक उर्जनले रेफ्रीको निर्णयमा असन्तुष्ट व्यक्त गरे ।

'रेफ्रीको निर्णयबाट सन्तुष्ट छैन । उनले थाइल्याण्डको पक्षमा धेरै निर्णय दिए । रेफ्रीले सही निर्णय दिएको भए पहिलो हाफमा थाइल्याण्ड १० खेलाडीमा झर्ने थियो,' उनले थपे ।

छनोट अन्तर्गत अब नेपालले शुक्रबार आयोजक भियतनाम र आइतबार चाइनिज ताइपेसँग खेल्नेछ ।

छनोटको समूह विजेता एसियन कपमा छनोट हुनेछन् । यस्तै उपविजेता हुने उत्कृष्ट ६ टोलीले समेत एसियन कप खेल्नेछ ।