एमयुएफसी विजयचोकले ‘सी’ डिभिजन छनौट खेल्दै

काठमाडौं ।  बेलायती फुटबल क्लब म्यान्चेस्टर युनाइटेडका नेपाली समर्थकको टोली एमयुएफसी विजयचोक युथ क्लब काठमाडौंले सहिद स्मारक ‘सी’ डिभिजन लिग छनौट खेल्ने भएको छ ।

सन् २०१२ मा गठन भएको एमयुएफसीले आगामी असोज ६ गतेबाट हुने सी’ डिभिजन लिग छनौट खेल्ने भएको हो ।

एमयुएफसी गत वर्ष सहिद स्मारक ‘सी’ डिभिजन लिग छनोटको सुपर ८ मा पुग्न सफल भएको थियो ।

आगामी दिनमा सामाजिक सेवासँगै व्यवसायिक फुटबललाई पनि निरन्तरता दिनका लागि आगामी असोज ६ गतेबाट हुने ‘सी’ डिभिजन लिग छनौट खेल्न लागेको क्लबका मेनेजर सुरेश नेपालले जानकारी दिए ।

नेपालका अनुसार एमयुएफसी विजयचोक युथ क्लबबीच सहकार्य गरेर दोस्रो पटक लिग फुटबल खेल्न लागेको हो ।

एन्फाले सहिद स्मारक ‘सी’ डिभिजन लिग छनौट खेलका लागि सार्वजनिक गरेको तालिका अनुसार असोज ६ गतेबाट उपत्यकामा सुरु हुने छनौट प्रतियोगितामा देशभरका ६० क्लब सहभागी हुने जानकारी दिएको छ । 

एन्फाले सहभागी ६० क्लबलाई  २० समूहमा विभाजन गरेको छ । प्रत्येक समूहमा ३ क्लब रहेका छन् ।

हरेक समूहको विजेता दोस्रो चरणमा प्रवेश गर्नेछ। दोस्रो चरण तथा नकआउट चरणलाई २ समूहमा विभाजन गरिएको छ। हरेक समूहका फाइनल विजेता ‘सी’ डिभिजन लिगमा छनोट हुनेछन्। यी समूहका सबै खेल कार्तिक २४ गते समापन हुनेछ ।