काठमाडौं । तनहुँको व्यास नगरपालिका–४ स्थित व्यास युवा क्लबको आयोजनामा आजदेखि व्यास युवा कप २०७९ फुटबल प्रतियोगिता सुरु भएको छ ।
राष्ट्र विकासमा युवाहरुको प्रतिबद्धता, सिर्जनशील, लगनशिल सहभागिता भन्ने नाराका साथ नाइन ए साइड फुटबल प्रतियोगिता सुरु भएको हो । प्रतियोगिताको व्यास नगरपालिकाको मेयर बैकुण्ठ न्यौपानेले उद्घाटन गरेका थिए ।
दमौलीको बीपी वन बाटिकाको मैदानमा सुरु भएको प्रतियोगिताको उद्घाटन खेलमा भुयङ्गा युथ क्लब विजयी भएको छ । भुयङ्गा र बाराही कलेजबीचको खेलको निर्धारित समयमा दुवै टिमले एक एक गोलको बराबरी गरेपछि खेलको नतिजा टाइब्रेकरबाट निकालिएको थियो । जसमा भुयङ्गा क्लब ४–३ गोल अन्तरले विजयी भएको हो । यस्तै आजै भएको अर्को खेलमा पाटन युथ क्लब विजयी भयो । पाटनले मुनसाइन एफसी माथि ४–० को फराकिलो जीत दर्ता गरेको हो ।
अखिल नेपाल फुटबल संघ एन्फाको प्राविधिक सहयोगमा जारी प्रतियोगिताको विजेताले १ लाख ११ हजार १ सय ११ रुपैयाँ नगद पुरस्कार प्राप्त गर्ने छ भने द्वितीय हुने टिमले ५५ हजार ५ सय ५५ रुपैयाँमा चित्त बुझाउने छ । प्रतियोगिताका विजेतालाई नगदका साथै मेडल, ट्रफी र प्रमाणपत्र प्रदान गरिने क्लबका अध्यक्ष मिनबहादुर गुरुङ चरिबाबाले जानकारी दिए ।
प्रतियोगितामा उत्कृष्ट खेलाडी, उत्कृष्ट गोल किपर र सर्वाधिक गोल कर्ता घोषित गरी जनही ५ हजार रुपैयाँ पुरस्कार प्रदान गरिने अध्यक्ष गुरुङले बताए । युवाहरुलाई फुटबल खेलतर्फ आकर्षण गर्ने र राष्ट्रिय एवं अन्तर्राष्ट्रिय फुटबल खेलाडी उत्पादन गर्ने उद्देश्यले उक्त प्रतियोगिताको आयोजना गरिएको क्लबका अध्यक्ष गुरुङले बताए ।
यसैगरी प्रतियोगिताको सर्वोत्कृष्ट खेलाडी, गोल रक्षक र रक्षकलाई पाँच हजार पाँच सय रुपियाँ पुरस्कार प्रदान गरिने छ ।
कूल १३ लाख रुपियाँ लगानीमा आयोजना गर्न लागिएको प्रतियोगितालाई व्यास नगरपालिका, स्थानीय सहयोगी संस्था र विदेशमा भएका क्लबका शुभचिन्तकले सहयोग गरेका छन् । नेपालीहरुको महान पर्व विजयादशमी, शुभदिपावली र छठ पर्वको अवसरमा उक्त फुटबल प्रतियोगिताको आयोजना गरिएको हो । प्रतियोगिताको समापन नेपाली कांग्रेसका वरिष्ठ नेता रामचन्द्र पौडेलले गर्ने छन् ।
