महिला साफ फाइनल : उर्जा र अनुभवको लडाई
काठमाडौं । साफ महिला च्याम्पियनसिपको इतिहासमा पहिलोपटक बंगलादेश र नेपाल उपाधिको लागि भिड्दै छन् । सोमबार दशरथ रंगशाला नयाँ इतिहासको साक्षी बन्न गईरहेको छ । पहिलोपटक महिला साफले नयाँ विजेता पाउँदैछ ।
बहुप्रतीक्षित बनेको साफ महिला च्याम्पियनसिप २०२२ को फाइनल अघि सेमिफाइनलमा पनि इतिहासहरु रचिए । जसमा सर्वकालीन च्याम्पियन भारतले समूह चरणमा बंगलादेश र सेमिफाइनलमा आयोजक नेपालसँग हार व्यहोर्दा पहिलोपटक बाहिरिनु पर्यो ।
दशरथ रंगशालामा शुक्रबार भएको सेमिफाइनल खेलमा नेपालसँग १–० गोल अन्तरले पराजित भएपछि डिफेन्डिङ च्याम्पियन भारत बाहिरिएको थियो ।
साफमा पाँचौ पटक नेपालले फाइनल खेल्न गईरहेको छ भने बंगलादेश २०१६ पछि फेरि फाइनल पुगेको छ । लगातार भारतसँग फाइनलमा पराजित हुँदै उपाधि बिमुख बनेको नेपालले घरेलु भुमिमा पहिलोपटक ट्रफी उचाल्ने सपना बुनेको छ । उता बंगलादेश दोस्रो पटकको फाइनलमा उपाधिमा जसरि भएपनि कब्जा गर्न चाहन्छ ।
दुबै टोलीको लागि सम्भावनाका बाटोहरु खुला छन् । दुबै टोलीलाई राम्ररी थाहा छ कि साफमा यस्तो मौका बिरलै पाइनेछ जहाँ भारतको डर हुनेछैन । भारत नामको डरलाई यसपटक दुवै टोली पछार्न सफल भए । त्यसैले केहि हदसम्म दुवै टोलीले बिगतमा जस्तो फाइनल अगाडी दबाब महसुस गरेका छैनन् ।
के छ बंगलादेशको अवस्था ?
साफ आउनुपूर्व नै बंगलादेशलाई अप्रत्यासित टोलीको परिचय दिईएको थियो । नभन्दै भयो त्यस्तै । प्रतियोगिताको कठिन समूहमा थियो बंगलादेश तर समूह बिजेता बन्दै सेमिफाइनल प्रवेश गर्न सफल रह्यो । अपराजित रहँदै फाइनल पुग्नुको हौसलामात्र होइन भारतमाथिको प्रभावशाली जितले उनीहरुको आत्मबल आकाशिएको छ । त्यसमाथि प्रतियोगितामा अहिलेसम्म कुनै गोल पनि व्यहोरेको छैन । सेउलि आजिम, अखि खातुन, सबिना खातुन, कृष्णा लगायतका खेलाडीले २०१६ को साफ फाइनलमा खेलेका थिए ।
बितेका ६ वर्षको अन्तरालमा धेरै कुरा फेरिएको छ । बंगलादेश महिला फुटबल बिगतमा भन्दा अब्बल देखिन्छ । मारिया मान्डा, मोनिका चक्मा जस्ता प्राविधिक रुपमा दक्ष खेलाडी थपिएका छन् । डिफेन्स मजबुत बनेको छ । स्वयम सबिना के मान्छिन् भने नेपाल बलियो टोली अवश्य हो तर बंगलादेश पनि कम छैन ।
'नेपालले घरेलु दर्शकको साथ पाउनेछ । नेपाली समर्थकको उपस्थितिले ठुलो प्रभाव पारेको हामीले सेमिफाइनलमा देखिसक्यौँ । तर बंगलादेशका खेलाडीहरू पनि ठुलो दर्शकको सहितको वातावरणमा खेलिसकेका छन् । त्यसैले हामीलाई दबाब छैन,' फाइनलको पूर्व सन्ध्यामा पत्रकार सम्मेलनमा बोल्दै सबिनाले आत्मविश्वास देखाईन् ।
'नेपाल टोलीलाई फाइनलमा घरेलु फाइदा छ, तर हाम्रो टोलीले यस प्रकारको अवस्थालाई सामना गर्न सक्छन् किनभने हामीले यहाँ धेरै पटक खेलेका छौं । हामी आफ्नो उत्कृष्ट प्रदर्शनलाई निरन्तरता दिनेछौं र इतिहास रच्नेछौं,' बंगलादेशका मुख्य प्रशिक्षक गुलाम रोब्बानी चोटनले दाबी गरे ।
'हो नेपालसँग दक्षिण एसियाकै उत्कृष्ट स्ट्राइकर साबित्रा भन्डारी छन् । हामीसँग पनि सबिना खातुन छन् । वास्तवमा हामी कुनै व्यक्ति भन्दा सम्पुर्ण टोलीमा केन्द्रीत छौँ । दुई टोली अहिलेसम्म उत्कृष्ट दौडमा छन् आशा गरौँ उत्कृष्ट खेल हुनेछ,' गोलोमले थपे ।
यस फाइनलले पुराना यादहरु पनि ताजा गराउने छ । एएफसी यू-१४ च्याम्पियनसिप २०१५ मा उमेर समूहको टोली लिएर आएका उनै गोलोम सिनियर टोलिविरुद्ध भिड्नेछन् । त्यो बेला महाभुकम्पले नेपाल र बंगलादेशको फाइनल खेल प्रभावित गरेको थियो । महाभुकम्पले त्रसित बनाएका केहि बंगलादेशी खेलाडीहरु अँझैपनि टोलिमा छन् ।
२८ वर्षीया कप्तान सबिना नेपालको लागि खतरा बन्न सक्छिन् । प्रतियोगितामा २ ह्याट्रिक सहित सर्वाधिक गोलकर्ता हुन् सबिना । उनलाई रोक्न नेपाललाई ठुलो चुनौती छ । यस्तै अर्की स्ट्राइकर मोसमत सोप्नले पनि चार गोल गरेर घातक बनिरहेकी छिन् । डिफेन्डरले अहिलेसम्म जुन अनुशासन र एकरुपता देखाएका छन् त्यो हेर्दा नेपालले गोल गर्न ठुलो संघर्ष गर्नुपर्ने हुनसक्छ ।
बंगलादेश सम्भावित-११ : रुप्ना चक्मा, सेउलि, सामसुनाहार, अखि, मसुरा प्रविन, मोनिका, सन्जिदा, मारिया, कृष्णा, मोसमत, सबिना
के छ नेपालको अवस्था ?
इतिहासमा पहिलो पटक भारतलाई पराजित गरेको नेपालको यो पाँचौं साफ फाइनल हो । सधै भारतबाट पराजित हुँदै आएको नेपाललाई यो जस्तो साफ उपाधि जित्ने सुनौलो अवसर सायदै कहिल्यै आयो होला । नेपाली टोली भारतविरुद्धको जितपछि आत्मविश्वासी देखिन्छ । शारिरिक भाषा उत्कृष्ट छ । घरेलु भुमिमा समर्थकको अगाडी ट्रफी उचाल्ने सपना बोकेको छ ।
प्रशिक्षक कुमार थापाले छैटौं संस्करणको महिला साफ च्याम्पियनसिपको उपाधि घरमै राख्ने लक्ष्य रहेको बताउँछन्।
'यो साफको लागि भावनात्मक र शारीरिक रुपमा धेरै मेहेनत गरेका छौँ । हाम्रो लागि साफको स्टार जर्सी लगाउने सपना छ,' प्रशिक्षक थापाले भने, 'त्यसको लागि जे पनि गर्नेछौँ । चाहे विरामी खेलाडी रिकभरी गरेर हुन्छ की केहि गरेर हुन्छ । हाम्रो लक्ष्य नै ट्रफी बाहिर जान नदिने हो ।'
कुमारले बंगलादेशको तारिफ गरे । र, उनीहरुसँग नेपाली टोलीको तुलना गर्दै दुवै पक्ष आ-आफ्नो क्षेत्रमा बलियो रहेको धारणा राखे ।
'बंगलादेशको टिम इनर्जी र स्प्रिट राम्रो छ । हामी उनीहरुलाई आदर गर्छौं । पहिलेको भन्दा बंगलादेश नयाँ र बलियो छ । मौषमले साथ दियो भने राम्रो खेल देखियोस भन्ने कामना गर्छु,' थापाले थपे,'हामीसँग अनुभव छ । हाम्रो बलियो पक्ष टिम वर्क हो ।'
कप्तान एन्जिला सुब्बा जसको नेतृत्वमा नेपालले इतिहास रचिसकेको छ । उनले अँझै धेरै कुरा बाँकी रहेको प्रतिक्रिया दिदै भनिन्, 'भारतलाई पहिलो पटक जितेर इतिहास बनायौं । हाम्रो टिमको प्रयासले हो । बोलेर भन्दा गरेर देखाउन बाँकी छ ।'
यो नयाँ नेपालको आत्मविश्वास हो । सबैभन्दा ठुलो मोडलाई पार गरेर बिन्दुको नजिक पुग्दै गर्दा नेपाल सजक भने हुनुपर्छ । बंगलादेश अप्रत्यासित टोली हो । उमेर समुहमा नेपालको बंगलादेशविरुद्ध खासै राम्रो इतिहास नभएपनि सिनियर स्तरमा भने नेपाल हाबी छ ।
सिनियर टोलीमा नेपालले बंगलादेशसँग अहिलेसम्म हारेको छैन । साफ च्याम्पियनसिपमा पनि नेपालले अहिलेसम्म बंगलादेशविरुद्ध तीनवटै खेल जितेको छ । दुई राष्ट्रबिच भएका ७ खेलमा नेपालले ५ जित र २ बराबरीको नतिजा निकालेको छ ।
गत वर्ष दशरथ रंगशालामा तिजको बेला सम्पन्न दुई मैत्रीपूर्ण खेल नेपालले पहिलो खेल २–१ ले जितेको थियो । दोस्रो खेल गोलरहित बराबरीमा रोकिएको थियो ।
साबित्रा र मन्जली डेंगुबाट रिकभर गरिरहेका छन् । यद्यपि भोलिको खेलमा साबित्रा खेल्ने सम्भावना धेरै छ । साबित्रा, अमिषा, रश्मी सबै स्ट्राइकर २/२ गोल गर्दै राम्रो लयमा छन् ।
नेपालको डिफेन्सले पनि अहिलेसम्म गोल व्यहोरेको छैन । विपक्षी फरवार्डलाई स्पेस दिएको छैन । एन्जिला सानदार खेल देखाइरहेकी छिन् । यसका बाबजुद बंगलादेशको आक्रमणप्रति सजक रहनुपर्छ । नेपालको डिफेन्सको परिक्षा हुने निश्चित छ ।
नेपालको सम्भावित- ११ : एन्जिला, पुनम, गीता, अमृता, हिरा, सरु, अनिता बस्नेत, अनिता केसी, दिपा शाही, रश्मी, साबित्रा
अन्तिम नतिजा : नेपाल २-१ बंगलादेश (खेलपाटी अनुमान)
