लामो समयबाट यसको पर्खाइमा थियौं - प्रशिक्षक थापा

काठमाडौं । नेपाली राष्ट्रिय महिला फुटबल टिमका मुख्य प्रशिक्षक कुमार थापाले भारतविरुद्ध महिला साफमा जित निकाल्न आफुहरुले विगत १२ वर्षबाट प्रतिक्षा गरेको बताएका छन् ।

दशरथ रंगशालामा शुक्रबार भारतलाई हराउँदै महिला साफ च्याम्पियनसिप फुटबलको फाइनलमा प्रवेश गरेपछि बोल्दै प्रशिक्षक थापाले यस जितका लागि लामो समय कुरेको बताए ।

प्रशिक्षक थापाले खेलाडीको मेहेनतले यो सम्भव भएको बताए ।

'हामी लामो समयदेखि यसको पर्खाइमा थियौं । बिगत १२ वर्षदेखि । सबै समर्थक, खेलाडी खुसी छन् । मलाई धेरै भन्नु छैन । खेलाडीले जित दिलाए,' थापाले भने ।   

दोस्रो सेमिफाइनलमा नेपालले साविक विजेता भारतलाई १-० गोल अन्तरले हराएको थियो । नेपाललाई जित दिलाउन रश्मी कुमारी घिसिङले निर्णायक गोल गरिन् ।

महिला साफको इतिहास भारतमाथि नेपालको यो पहिलो ऐतिहासिक जित हो । यस अघि नेपालले महिला साफमा भारतलाई हराउँन सकेको थिएन ।

 यस्तै भारतलाई समग्रमा नेपालले दोस्रो पटक हराएको हो ।

अब नेपालले फाइनलमा बंगलादेशको सामना गर्नेछ । फाइनल खेल सोमबार हुनेछ ।

भारतका मुख्य प्रशिक्षक सुरेन छेत्रीले आफुले हार स्वीकार गर्ने बताए । उनले फाइनल पुगेको दुबै टोलीलाई बधाई दिए ।

'हामी यस हारलाई स्वीकार गर्छौं ।  सफलता आउने मेहेनतले हो । तपाईहरु सबैलाई थाहा छ हाम्रो तयारी कस्तो थियो,' उनले भने, 'फाइनल पुगेकोमा दुबै टोलीलाई बधाई । हामीले राम्रो पोसेसन राखेको थियौं । तर, क्यापिटलेज गर्न सकेनौं । नेपालले दोस्रो हाफमा धेरै मेहेनत गरेर रोक्यो र जित्यो ।'