श्रीलंकाविरुद्ध नेपालको शतप्रतिशत प्रदर्शन

काठमाडौं । अन्तर्राष्ट्रिय महिला फुटबलमा नेपालले धेरै पल्ट सामना गरेको एक प्रतिद्वन्द्वीमा पर्छ, श्रीलंका ।

नेपालले अहिलेसम्म सात पल्ट श्रीलंकाविरुद्ध खेलेको छ र त्यसमध्ये खुसीको संयोग सबैमा शतप्रतिशत जित निकालेको छ ।

वुमेन्स साफ च्याम्पियनसिप २०२२ मा नेपालले आज सोमबार यही श्रीलंकाको सामना गर्दैछ ।

असम्भव जस्तै देखिने ठूलो अन्तरको एकपक्षीय हार बाहेक नेपाल यस खेलको नतिजा आफू अनुकुल गर्दै सेमिफाइनल पुग्ने तय देखिन्छ ।

नेपालले श्रीलंकाविरुद्ध खेलको सात खेलमध्ये पाँच साफ च्याम्पियनसिपका छन् भने दुई दक्षिण एसियाली खेलकुद (साग) का छन् । साफ च्याम्पियनसिपका खेलमध्ये नेपालले सन् २०१० को पहिलो भेटमा श्रीलंकालाई ८–१ ले हराएको थियो ।

त्यो नै एक मात्र यस्तो गोल हो, जसयता श्रीलंकाले छ खेलमा कुनै गोल गर्न सकेको छैन् । श्रीलंकाविरुद्ध नेपाल सन् २०१२ मा ३–०, २०१४ मा ३–०, २०१६ मा १–० र २०१९ मा ४–० ले विजयी रहेको थियो ।

यस्तै सागमा श्रीलंकाविरुद्ध नेपाल २०१६ मा ४–० र २०१९ मा १–० ले विजयी रह्यो ।