साफ यू-१७ : नेपालको लक्ष्य मात्र उपाधि  

काठमाडौं । साफ यू-१७ पुरुष च्याम्पियनसिप फुटबल प्रतियोगिता श्रीलंकामा भोलि सोमबारबाट सुरु हुँदैछ ।

प्रतियोगितामा नेपालसहित आयोजक श्रीलंका, भारत, भुटान, बंगलादेश र माल्दिभ्स गरि ६ टोलीको सहभागिता रहेको छ ।

प्रतियोगिताका लागि नेपाली टोली कोलम्बो पुगिसकेका छन् । प्रतियोगितामा नेपालको मुख्य लक्ष्य उपाधि जित्नु रहेको छ ।

'नेपालको लक्ष्य उपाधि जितेरै जाने हो । यो भन्दा अघि हाम्रो दोस्रो भएका छौँ । यस पटक जितेरै जाने हो त्यहिँ अनुसार टिम तयारी भएको छ । राम्रो भएको छ । खेलाडीहरु पनि राम्रो छ,' प्रतियोगिता अघि मुख्य प्रशिक्षक उर्जन श्रेष्ठले भने।

प्रतियोगिताका लागि तयारी राम्रो रहेकाले पनि नेपालले लक्ष्य पूरा गर्नेमा उर्जन विश्वस्त छन् ।

'तयारी हाम्रो एकदम राम्रो भईरहेको छ । एक डेढ महिनादेखि तयारी छ । श्रीलंकामा पनि २-३ दिन ट्रेनिङ गर्ने मौका पायौं । यहाँको ग्राउण्डको अवस्था बुझ्ने मौका पायौं । तयारी राम्रो छ,' उनले थपे ।

प्रशिक्षक उर्जनले सहभागी सबै टोलीको स्तर एकै भएको समेत बताए ।

'यू-१९ सबैको जुनियर टिम हो । मेहेनत गर्छन, सबै टिमको स्तर एकै हो जस्तो लाग्छ । भुटानको पनि ग्रासरुट धेरै राम्रो छ,' उर्जनले भने, 'भारत त्यस्तै राम्रो देखिरहेको छ । तर, सबै टिमको स्तर एकै हो जस्तो लाग्छ ।'

नेपाली टिमका कप्तान प्रशान्त लक्ष्समले टिमको तयारी राम्रो भएको र भारतलाई बलियो टोलीको रुपमा लिएको बताए।

'हाम्रो तयारी राम्रो भएको छ । हाम्रो टिमको बलियो पक्ष भनेको एकता हो,' उनले भने, 'भारतको ग्रासरुट राम्रो भएकाले कठिन टिमको रुपमा लिएका छौँ ।'

 

प्रतियोगितामा नेपाल समूह 'बी' मा रहेको छ । नेपालको समूहमा भारत र भुटान रहेको छ ।

साफ यू-१७ को पहिलो खेलमा नेपालले भुटानको सामना गर्नेछ । नेपालले भुटानसँग सेप्टेम्बर ७ मा प्रतिस्पर्धा गर्नेछ ।

यस्तै नेपालले दोस्रो खेलमा भारतसँग सेप्टेम्बर ९ मा खेल्नेछ ।

समूह 'ए' मा आयोजक श्रीलंका, माल्दिभ्स र बंगलादेश रहेको छ ।

समूहको शीर्ष दुई टोलीले सेमिफाइनलमा स्थान बनाउने छन् ।

फाइनल सेप्टेम्बर १४ मा हुनेछ ।

नेपाली टोली -

गोलकिपरः क्रिसल मोक्तान, समीर चन्द, रुबिन बोगटी

डिफेन्डरः अश्विन घोरासैनी, सिमान्त थापा, उनेश बुढाथोकी, मदन पौडेल, दिपक थापा मगर, निशान्त तामाङ, युनिश मगर, विक्रम तामाङ, प्रीतम कार्की, धिरज विश्वकर्मा

मिडफिल्डरः प्रशान्त लक्ष्सम, मिराक लिङ्देन, सरोज दर्लामी, हरिशराज भट्ट, लच्छु थापा

फरवार्डः निरज कार्की, धनसिंह विक, विनोद केसी, सिजल राई, सुवास बम