लालीगुराँसको अपराजित यात्रा कायमै

काठमाडौं। अब्दुल युसुफको दुई गोलसँगै राष्ट्रिय लिगमा लालीगुराँस एसोसिएसन क्लबले अपराजित यात्रा कायमै राखेको छ।

त्रिपुरेश्वरस्थित दशरथ रंगशालामा शुक्रबार सम्पन्न खेलमा लालीगुराँसले सातदाेबाटो युथ क्लबलाई ३-१ ले हराएको हो।

लिगमा लालीगुराँसको पाँचौँ जित हो। सातदोबाटोको तेस्रो हार हो। लालीगुराँसले ६ खेलमा १४ अंक जोडेको छ। भने समान खेल खेलेको सादोबाटोको ५ अंक छ।

खेलको तेस्रो मिनटमा सातदाेबाटोले पाएको पहिलो अवसरलाई सदुपयोग गर्न सकेन। सातदाेबाटोका समीर तामाङको क्रसमा फोडे फोफानाले प्रहार गरेको हेडरलाई लालीगुराँसका गोलकिपर कुम्बा देउवाले उत्कृष्ट बचाउ गर्दै टोलीको संकट टारे।

त्यसको १३औं मिनेटमा सातदाेबाटोका एक्शा हाङ लिम्बूले गरेको प्रहारले लक्ष्य लिन सकेन। ३५औं मिनेटमा अब्दुलले गोल गर्दै लालीगुराँसलाई सुरूआती अग्रता दिलाए। त्यसको तीन मिनेटपछि अब्दुलले व्यक्तिगत दोस्रो गोल गर्दै लालीगुराँसको अग्रतालाई दोब्बरले बनाए।

४४औं मिनेटमा सातदाेबाटोको मिङमा ग्याल्जेन लामाले रातो कार्ड पाएर मैदानबाट बाहिरिए। मिङमाले रातो कार्ड पाएसँगै सातदाेबाटो १० खेलाडीमा सिमित भयो।

पहिलो हाफको इन्जुरी समयमा सातदाेबाटोको फोडे फोफानाको प्रहारलाई लालीगुराँसको गोलकिपर कुम्बाले बचाए।

खेलको ५२औं मिनेटमा सुवास गोलेले गाेल गर्दै सादोबाटोलाई २-१ स्थितिमा ल्याए। ६६औं मिनेटमा लछु थापाले गोल गर्दै लालीगुराँसलाई ३-१ सहज जित दिलाए।