बाल गोपाललाई बागमती प्रदेशको फुटबल हेर्ने जिम्मेवारी

काठमाडौं । प्रशिक्षक बाल गोपाल महर्जनले नवौं राष्ट्रिय खेलकुदमा बागमती प्रदेशको फुटबल टिम हेर्ने भएका छन् ।

प्रदेश खेलकुद विकास परिषद् बागमतीले राष्ट्रिय फुटबल टिमका पूर्व प्रशिक्षक तथा पूर्व खेलाडी महर्जनलाई टिम हेर्ने जिम्मेवारी दिएको छ । 

बागमती प्रदेश खेलकुद विकास परिषद्का सदस्य सचिव सुर्यलाल भण्डारीले खेलाडी छनोट र प्रशिक्षणको जिम्मेवारी महर्जनलाई दिईएको जानकारी गराए । 

गण्डकीमा आयोजना हुने नवौं राष्ट्रिय खेलकुदका लागि बागमतीको प्रदेश स्तरीय छनोट चलिरहेको छ ।

छनोटबाट प्रशिक्षक महर्जनले बागमतीको फुटबल टोली निर्माण गर्ने छन्  । 

यस अघि बागमती प्रदेशले क्रिकेट टिम हेर्ने जिम्मेवारी पूर्व कप्तान पारस खड्कालाई दिएको थियो । 

बागमती प्रदेशले सहभागी ३६ खेलका लागि संयोजक समेत तोकिसकेको छ ।

बागमती प्रदेशले छनोटबाट आएका खेलाडीलाई ४५ दिन बन्द प्रशिक्षणमा राख्ने र स्वर्ण पदक विजेतालाई दशौं राष्ट्रिय खेलकुदसम्म मासिक ६ हजार रुपैयाँका दरले भत्ता दिने निर्णय गरिसकेको छ ।

नवौं राष्ट्रिय खेलकुदमा बागमतीले पहिलो स्थान हासिल गर्ने लक्ष्य राखेको छ । 

सरकारले नवौं राष्ट्रिय खेलकुद प्रतियोगिता यस वर्ष असोज २८ देखि कात्तिक ३ गतेसम्म गण्डकी प्रदेशमा आयोजना गर्दैछ ।