कर्णालीले पदकका सम्भावित खेलाडीलाई बन्द प्रशिक्षणमा राख्ने

काठमाडौं । कर्णाली प्रदेश सरकारले पदकका सम्भावित खेलका खेलाडीलाई बन्द प्रशिक्षणमा राख्ने निर्णय गरेको छ ।  प्रदेश खेलकुद परिषद् कर्णाली प्रदेशको शुक्रबार सम्पन्न बैठकले नवौं राष्ट्रिय खेलकुदमा पदकको सम्भावना बोकेका खेलका खेलाडीलाई बन्द प्रशिक्षणमा राख्ने निर्णय गरेको हो । 

प्रदेशका समाजिक विकास मन्त्री यज्ञबहादुर बुढाक्षेत्रीको अध्यक्षतमा बसेको प्रदेश खेलकुद विकास परिषद्को बैठकले भदौ २५ गतेबाट पदकका सम्भावित खेलाडीलाई बन्द प्रशिक्षणमा समावेश गर्ने निर्णय गरको हो ।

नवौं राष्ट्रिय खेलकुद प्रतियोगिताको सहभागीता र तयारीको सम्बन्धमा प्रदेशका १० वटै जिल्लाका जिल्ला खेलकुद विकास समितिका अध्यक्ष सहितको बैठकले १५ गतेदेखि १८ गतेसम्म जिल्ला छनोट सम्पन्न गर्ने र भदौ २४ गतेसम्म प्रदेश टिम छनोट गर्ने निर्णय गरेको छ । 

बैठकले नवौंको प्रदेशको तयारीका लागि थप बजेट ब्यवस्थापनका लागि प्रदेश सरकारसँग माग गर्ने पनि निर्णय गरेको छ । प्रदेश सरकारको वार्षिक बजेटमै नवौंको तयारीका लागि १ करोड ३० लाख रुपैयाँ बजेट विनियोजन गरेको थियो । बैठकले प्राप्त बजेट अपुग हुने देखिएको भन्दै थप १ करोड २२ लाख रुपैयाँ बजेटको माग गर्ने निर्णय गरेको हो ।

कर्णाली प्रदेश खेलकुद विकास परिषद्का सदस्य सचिव विश्वमित्र सञ्जेलले नवौंको छनोट र तयारीमा करिब ३ करोड खर्च लाग्ने अनुमान गरिएको बताए । 

'सदस्य सचिवको निर्णयले खेलाडी छनोट हुने भएकाले शुक्रबार अन्तरक्रिया कार्यक्रममा छलफल मात्र भएको हो । थप बजेट माग सम्बन्धि निर्णय अस्ती भदौ २ गतेनै भएको छ ।' सञ्जेलले खेलपाटीसँग भने ।

कर्णाली प्रदेशले नवौं राष्ट्रिय खेलकुदमा ३६ मध्य २८ खेलमा सहभागी हुने निर्णय गरेको छ । भदौ १५ गतेभित्र प्रदेश सहभागी हुने खेलको लिस्ट तयार हुने सदस्य सचिव सञ्जेलले बताएका छन् ।

नवौं राष्ट्रिय खेलकुद गण्डकी प्रदेशका विभिन्न जिल्लामा असोज २८ देखि कात्तिक ३ गतेसम्म आयोजना हुदैछ ।