काठमाडौं । स्पेनिस क्लब रियल मड्रिडका मुख्य प्रशिक्षक कार्लो एन्सेलोटीले मिडफिल्डर क्यासेमिरो इंग्लिस क्लब म्यानचेस्टर युनाईटेडमा अनुबन्धित हुने पुष्टि गरेका छन् ।
शुक्रबार आयोजित एक पत्रकार सम्मेलनमा प्रशिक्षक एन्सेलोटीले क्यासेमिरोले क्लब छाड्न लागेको पुष्टि गरे ।
'मैले कासेमिरोसँग कुरा गरेको छु । उनी नयाँ चुनौती खोज्न चाहन्छन् । हामीले उनको निर्णय बुझेका छौं,' एन्सोलोटीले भने, 'वार्ता जारी छ तर उनले रियल मड्रिड छोड्ने निर्णय गरेका छन्।'
युनाइटेडले क्यासेमिरोलाई ६० मिलियन युरो र थप १० मिलियन युरो (एड अन) मा अनुबन्धको तयारी गरिरहेको छ । ३० वर्षीय ब्राजिलियनसँग आगामी केहि दिनमा सम्झौता पूरा हुनेमा युनाइटेड आशावादी छ ।
यस्तै एन्सेलोटीले क्यासेमिरो ला लिगा अन्तर्गत शनिबारको खेलमा उपस्थित नहुने बताए ।
'क्यासेमिरोले शनिबार खेल्ने छैनन् । प्रतिस्थापनमा हामीले टुचामेनी अनुबन्ध गरेका छौँ उनी उत्कृष्ट मध्ये एक हुनुहुन्छ,' उनले थपे ।
तीन ला लिगा र पाँच च्याम्पियन्स लिग जितेका क्यासेमिरो सन् २०१३ देखि रियलमा छन् ।
क्यासेमिरोको रियलसँग २०२५ सम्मको सम्झौता रहेको छ ।
उनी यस वर्षको बालोन डी’ओरका लागि मनोनयनमा परेका ३० खेलाडीको सूचीमा छन् ।
-1755526339.jpg)
