काठमाडौं । अखिल नेपाल फुटबल संघ (एन्फा) ले अन्यौलतामा रहेको फ्रेन्चाइज फुटबल नेपाल सुपर लिग (एनएसएल) को बारेमा निर्णय गर्न कमिटि गठन गरेको छ ।
अखिल नेपाल फुटबल संघ (एन्फा) को आज बसिरहेको दोस्रो कार्यसमिति बैठकले कमिटि गठन गरेको हो ।
बैठकले एन्फा अध्यक्ष पंकज विक्रम नेम्वाङको संयोजकत्वमा कमिटि गठन गरिएको बैठक सहभागी एक सदस्यले जानकारी दिए ।
कमिटिको सदस्यमा एन्फा उपाध्यक्ष दिपक खतिवडा, कुमार केसी र सदस्य टिका लामा, मनिराज विष्ट, रविन्द्र चन्द र पुरुषोत्तम थापा रहेका छन् ।
पछिल्लो समय ए डिभिजनका असन्तुष्ट ४ क्लब र फ्रेन्चाईज फुटबल एनएसएलको विवाद टुंगिएको छैन ।
'ए' डिभिजन क्लबका ४ क्लब थ्री स्टार, मनाङ मर्स्याङ्दी, संकटा र न्युरोड टिम (एनआरटी) ले एनएसएलसँगको सम्झौता रद्दका लागि एन्फासँग माग गरेको थियो । एन्फाले सम्झौता रद्दका लागि कार्यसमितिमा सिफारिस गर्ने निर्णय गरिसकेको छ ।
अघिल्लो कार्यसमितिले एनएसएल आयोजक नेपाल स्पोर्टस म्यानेजमेन्ट एण्ड इभेन्ट कम्पनीलाई भदौ २५ देखि कात्तिक ५ गतेसम्म दोस्रो संस्करण आयोजनाको स्विकृती दिएको थियो ।
यस्तै बैठकले उपाध्यक्ष विराट जंग शाहीको संयोजकत्वमा पदपूर्ति समिति गठन गरेको छ । समितिको सदस्यहरुमा अनिल मल्ल र मनिष जोशी छन् ।
