राखेप बोर्ड बैठक आईतबार बस्ने  

काठमाडौं । राष्ट्रिय खेलकुद परिषद् (राखेप)को बोर्ड बैठक आगामी आईतबार बस्ने भएको छ । युवा तथा खेलकुद मन्त्री महेश्वरगंज गहतराजले परिषद्को १ सय १३ औं बोर्ड बैठक साउन १५ गते बोलाएका छन् । 

राखेप सदस्य सचिव टंकलाल घिसिङले पठाएको सुचना अनुसार सिंहदरबारस्थित युवा तथा खेलकुद मन्त्रालयको बैठक हलमा बस्ने बैठक बिहान साढे ११ बजे सुरु हुनेछ । बैठकमा मुख्य दुई एजेण्डा राखिएको छ । राखेपको वार्षिक कार्य योजना र नवौं राष्ट्रिय खेलकुदको तयारीको सन्दर्भमा बैठक बस्न लागेको हो । 

नयाँ आर्थिक वर्ष सुरु हुदै गर्दा मन्त्रालयले वार्षिक कार्य योजना सहितको छलफल गर्न बोर्ड बैठक बोलाएको हो । राष्ट्रिय खेलकुद विकास ऐनमै परिषदको काम, कर्तव्य र अधिकारमै बोर्ड बैठकले वार्षिक योजना, कार्यक्रम तथा बजेट स्वीकृत गर्ने उल्लेख छ । यस्तै असोजमा हुन गईरहेको नवौं राष्ट्रिय खेलकुदको तयारीको सन्दर्भमा समेत बैठकमा छलफल हुने परिषद्का एक बोर्ड सदस्यले खेलपाटीलाई बताए । 

युवा तथा खेलकुद मन्त्रालयले गण्डकी प्रदेशमा हुन गईरहेको नवौं राष्ट्रिय खेलकुद प्रतियोगिताका लागि विभिन्न विषयगत उपसमिति बनाएर तयारी अघि बढाएको छ । प्रतियोगिताको तयारी स्वरुप खेल सामाग्री खरिदका लागि टेण्डर प्रक्रिया अघि बढेको छ भने जिम्मेवारी पाएका विभिन्न उपसमितिका संयोजकले तयारीको कामलाई अघि बढाएका छन् ।

समन्वय परिषदको बैठक

राखेपको बोर्ड बैठक अघि मन्त्रालयले समन्वय परिषद्को बैठक राखेको छ । संघीय युवा तथा खेलकुद मन्त्रालयको आयोजनामा बस्ने बैठकमा विभिन्न सातै प्रदेशका खेलकुद तथा सामाजिक विकास मन्त्री तथा सदस्य सचिवहरुको उपस्थिती रहनेछ । बैठक आगामी शुक्रबारका लागि आह्वान गरिएको छ ।

युवा तथा खेलकुद मन्त्री महेश्वरगंज गहतराजका अनुसार बैठकले नवौं राष्ट्रिय खेलकुदको तयारी र बजेट व्यवस्थापनको विषयमा छलफल गर्नेेछ । राष्ट्रिय प्रतियोगिता आयोजना गर्ने गरि अघि सरेको संघीय मन्त्रालयले प्रदेशको तयारी, सहभागीता र आवश्यक सहजीकरणका लागि समन्वय परिषद्को बैठक बोलाईएको मन्त्री गहतराजले खेलपाटीलाई बताए ।