स्पेनविरुद्ध इंग्ल्यान्डको सबैभन्दा ठूलो परीक्षा

काठमाडौं । वुमेन्स युरो २०२२ को पहिलो क्वाटरफाइनलमा आज इंग्ल्यान्ड र स्पेन भिड्दै छन् । ब्राइटनको एमेक्स स्टेडियममा हुने खेल आज राति नेपाली समय अनुसार १२:४५ मा हुनेछ । आयोजकका लागि युरोमा अहिलेसम्मकै सबैभन्दा ठूलो परीक्षा हुनेछ, किनभने स्पेन प्रतियोगितामा उपाधिको सबैभन्दा ठूलो दावेदार हो । फिफा वरीयतामा दुई टिमबीच खालि एक स्थानको मात्र अन्तर छ । स्पेनी टिममा युरोपेली च्याम्पियन्स लिग विजेता खेलाडीको बाहुल्यता छ।

अर्कोतर्फ इंग्ल्यान्ड टिम राम्रो लयमा छ, उसलाई घरमा खेल्ने फाइदा छ । सेमिफाइनल प्रवेशका लागि दुवै टिमबीच बराबरीको रोमाञ्चक टक्कर चल्ने निश्चित छ । सायद इंग्ल्यान्ड केही बढी आत्मविश्वासी हुनेछ, किनभने उसले लिग चरणमा निकै राम्रो गरेको छ । आठौं वरीयताको इंग्ल्यान्ड पछिल्ला १७ खेलमा अपराजित छ, यो प्रदर्शन प्रशिक्षक सरिना वेगमन सेप्टेम्बरमा आएयता हो । लिग चरणमा पनि इंग्ल्यान्ड तीनै खेलमा सजिलै विजयी रह्यो ।

त्यसक्रममा उसले १४ गोल गरेको छ, त्यो पनि कुनै गोल नखाएर । त्यसमा एक जित नर्वेमाथि प्राप्त आठ गोलको सफलता पनि पर्छ । इंग्लिस कप्तान लेह विलियमसन भन्छिन्, ‘हामीले लिग चरणमा जुन प्रकारको मजबुत खेल प्रदर्शन गरेका छौं, त्यसले समर्थकमा आत्मविश्वास बढाएको छ । हाम्रो खेलबाट सबै खुसी भएको हुनु पर्छ र आनन्द महसुस गरिरहेको पनि हुनु पर्छ ।’ स्पेनको वरीयता भने सातौं हो र लिग चरणमा उसको प्रदर्शन ठ्याक्कै अपेक्षा अनुसार रहेको छैन् ।

आफ्नो समूहको दोस्रो स्थानमा रहेको स्पेन जर्मनीको हातबाट पराजित रहेको थियो । अन्य दुई जित भने स्पेनका लागि सजिलो रहेन् । फिनल्यान्ड र डेनमार्कविरुद्ध प्राप्त दुवै टिममा स्पेन संघर्ष गर्न बाध्य रह्यो । तर इंग्ल्यान्ड जस्तै जर्मनी पनि विरलै मात्र पराजित हुने गर्छ, जर्मनीविरुद्ध उसको हार, सन् २०२० को मार्चयता पहिलो थियो । त्यससँगै उसनको २४ खेलमा अपराजित यात्रामा टुंगो लागेको थियो । स्पेनको खेलको सबैभन्दा ठूलो विशेषता हो, बलमाथि सक्दो बढी नियन्त्रण राखेर खेल्ने ।

टिमका प्रमुख खेलाडी त्यस बार्सिलोना टिमका छन्, जसले स्पेनको घरेलु लिगमा प्रभुत्व त कायम गरेकै छ, लगातार युरोपेली च्याम्पियन्स लिगको फाइनल पनि खेलेको छ । इंग्ल्यान्ड लगातार चौथो पल्ट ठूला प्रतियोगिताको सेमिफाइतल प्रवेशको दाउमा हुनेछ । स्पेनलाई लागेको सबैभन्दा ठूलो धक्का हो, टिममा चोटका कारण बेलन डे’अर विजेता एलेक्सिया पटेलास र सर्वकालीन सर्वाधिक गोलकर्ता जेनिफर हेमोसो छैनन् । समस्या त इंग्ल्यान्डलाई पनि छ ।

उसका प्रशिक्षक वेगमन स्पेनविरुद्धको खेलमा डगआउटमा रहने सम्भावाना कम छ, किनभने उनी कोरोना संक्रमतबाट ग्रसित छिन् । उत्तरी आयरल्यान्डविरुद्ध प्राप्त अन्तिम लिग खेलमा पनि उनी मैदानमा थिइनन् । स्पेनी प्रशिक्षक जोगै भाल्डा भन्छन्, ‘इंग्ल्यान्ड अहिले जसरी खेलिरहेको छ, त्यस आधारमा हाम्रो लागि यो पक्कै पनि निकै गाह्रो खेल हुनेछ । इंग्ल्यान्डलाई घरेलु दर्शकको समर्थन पनि प्राप्त हुनेछ । यही तथ्यले हामीलाई राम्रो खेल्न प्ररित भने गरिरहने छ ।’

–एएफपीको सहयोगमा ।