सेपाकताक्रोको मुख्य प्रायोजकमा केटीएम सिटी

काठमाडौं । सेपाकताक्रो राष्ट्रिय टिमको मुख्य प्रायोजकको रुपमा केटीएम सिटी जोडिएको छ । शेर्पा आउटडोरको केटीएम सिटीले सेपाकताक्रोको पुरुष र महिला राष्ट्रिय टिमलाई मुख्य प्रायोजकको रुपमा सहकार्य गरेको हो । 

सम्झौता अनुसार केटीएम सिटी अब सेपाकताक्रो टिमको मुख्य किट पार्टनर रहनेछ । राष्ट्रिय टिमका खेलाडीलाई आवश्यक पर्ने सम्पुर्ण किट केटीएम सिटीले प्रायोजन गर्नेछ । 

नेपालको सेपाकताक्रो टिमले थाइल्याण्डमा हुने सेपाकताक्रो विश्व च्याम्पियनसिप ३५ औं संस्करणको किग्स कप खेल्न जादैछ । प्रतियोगिता खेल्न जानु अघि सेपाकताक्रोको केटीएम सिटीसँग सम्झौता भएको हो । 

केटीएम सिटीका मार्केटिङ अफिसर सजोल चित्रकारले सम्भावना बोकेका नेपालको विभिन्न खेललाई सहयोग गर्ने उद्धेश्य सहित सेपाकताक्रोसँग जोडिएको बताए । उनले नेपालका अधिकांश खेलसँग सहकार्य गर्ने लक्ष्य सहित अघि बढिरहेको उल्लेख गरे ।

शेर्पा आउटडोरको केटीएम सिटी राष्ट्रिय फुटबल टिमको मुख्य किट पार्टनर पनि हो । केटीएम सिटीले फुटबल सहित भलिबल, बास्केटबल, मार्सलआर्ट लगायतका विभिन्न खेलसँग सहकार्य गर्दै अघि बढिरहेको छ ।