काठमाडौं । अखिल नेपाल फुटबल संघ (एन्फा)का उपाध्यक्ष कुमार केसीले संघको आसन्न कार्यसमिति बैठकमा एजेण्डा थप्न माग गरेका छन् । नवनिर्वाचित कार्यसमिति वार्षिक कार्यक्रम सहित अघि बढ्नुपर्ने बताउँदै उनले आसन्न बैठकमा ५ वटा एजेन्डा थप्न माग गरेका हुन् ।
उपाध्यक्ष केसीले एन्फा मुख्यालय पुगेर महासचिव किरण राई समक्ष एजेण्डा थपको विषयमा पत्र दर्ता गराएका छन् ।
उपाध्यक्ष केसीले विशेष साधारण सभाको मिति तोक्नुपर्ने, महिला लिगको दोस्रो चरणको खेलको सम्बन्धमा निर्णय गर्नुपर्ने, राष्ट्रिय लिग गर्ने सम्बन्धमा कार्यसमिति बैठकले निर्णय गर्नुपर्ने माग गरेका छन् ।
राष्ट्रिय महिला लिगको पहिलो चरण समाप्त भैसकेको छ । तर एन्फाले दोस्रो चरणको लिगको सन्दर्भमा कुनै निर्णय गरेको छैन । नयाँ कार्यसमितिले स्थगित अवस्थामा रहेको महिला लिगको सन्दर्भमा कुनै पनि छलफल अघि बढाउने तयारी गरेको छैन । सोही कारण महिला लिगको दोस्रो चरण अन्यौलमा छ ।
उपाध्यक्ष केसीले महिला लिगको दोस्रो चरणको खेलको सम्बन्धमा निर्णय गरेर जानुपर्ने माग गरेका छन् ।
उनले लिगको क्यालेन्डर अनुसार ए, बी र सी डिभिजन लिगको समय निर्धारण गर्नुपर्ने र दुई वर्षदेखि स्थगित अवस्थामा रहेको उमेर समुहको प्रतियोगिता ललित स्मृति यू–१८ खेल गराउने सम्बन्धि एजेण्डामा छलफल गर्नुपर्ने माग गरेका छन् ।
एन्फाले साउन २ गतेको कार्यसमिति बैठकमा एनएसएलसँगको सम्झौता रद्ध गर्ने, विभिन्न पदाधिकारी नियुक्ति गर्ने लगायतका १२ वटा एजेण्डामा छलफल गर्ने भन्दै कार्यसमिति सदस्यलाई पत्र पठाएको छ ।
उपाध्यक्ष केसीले फुटबल गतिविधि सञ्चालनका लागि तत्काल प्रतियोगिताको मिति तोकेर अघि बढ्नुपर्ने लगायतका एजेण्डामा छलफलको माग गरेका छन् ।
‘नयाँ कार्यसमितिले फुटबलको क्यालेन्डर बढाएर अघि बढ्नुपर्ने हो । तर एजेण्डामा सो विषय समावेश भएको देखिएन ।’ केसीले खेलपाटीसँग भने, ‘बजेट निर्माण गरेर फुटबलको कार्यक्रमनै निर्धारण गरेर अघि जानपर्छ ।’
एन्फाको नयाँ नेतृत्वले घरेलु फुटबलका गतिविधि अघि बढाउने वार्षिक क्यालेन्डरको विषयमा कार्यसमितिमा कुनै एजेण्डा बनाएको छैन । घरेलु लिगको मिति नतोक्दा खेलाडीहरु बेरोजगार अवस्थामा छन् ।
घरेलु प्रतियोगिता नहुँदा खेलाडी विदेश पलायन हुने क्रम बढेको छ । तत्काल लिगको मिति तोकेर खेलाडी र फुटबलको गतिविधि अघि बढाउनुपर्ने दायित्व एन्फा समक्ष छ ।
