फाप्ला विकास समितिको पहिलो बैठक सम्पन्न

काठमाडौं । फाप्ला अन्तराष्ट्रिय क्रिकेट मैदान तथा खेलग्राम पूर्वाधार निर्माण विकास समितिको पहिलो बैठक धनगढीमा सम्पन्न भएको छ ।

समितिका अध्यक्ष सुवास शाहीको अध्यक्षतामा बसेको बैठकमा संघीय सरकारका युवा तथा खेलकुद मन्त्री महेश्वर गहतराज, मन्त्रालयका सचिव दामोदार रेग्मी, धनगढी उपमहानगरका नगरप्रमुख गोपाल हमाल, कृष्णपुर नगरपालिकाका नगरप्रमुख हेमराज ओझा लगायत प्रदेश मन्त्रालयका अधिकारी लगायतको उपस्थिती रहेको थियो । 

बैठकले धनगढी उपमहानगरभित्र उपयुक्त स्थानमा यथाशिघ्र कार्यालय स्थापना गर्ने, समितिका लागि आवश्यक कर्मचारीको अस्थायी दरबन्दी स्वीकृतिका लागि मन्त्रालयलाई सिफारिस गर्ने, डीपीआर तयारीका लागि कार्यक्षेत्रगत शर्त तथा लागत अनुमान गर्ने र डीपीआर तयारीका लागि परामर्शदाता छनोट गर्ने कार्य अघि बढाउने, इआइएको कार्य अघि बढाउन कार्य क्षेत्रगत शर्त तथा लागत अनुमान तयार गरी परामर्शदाता छनोटको काम अघि बढाउने, समितिलाई आवश्यक पर्ने बजेट सरकारसँग माग गर्ने लगायतको निर्णय गरेको छ । 

समिति बैठकमा खेलकुद मन्त्री गहतराजले फाप्ला अन्तर्राष्ट्रिय क्रिकेट मैदान तथा खेलग्राम सुदूरपश्चिमको मात्रै नभई देशकै विकासको कोशेढुंगा रहेकोले सरकारले यसलाई उच्च प्राथमिकतामा राखि निर्माण कार्यलाई द्रूत गतीमा अघि बढाउने प्रतिबद्धता जनाए । विकासमा राजनीति गर्न नहुने दोहोर्याउँदै उनले रंगशाला निर्माण अभियानमा जोडिन सम्पूर्णलाई आह्वान गरे ।

समितिका अध्यक्ष शाहीले सुदूरपश्चिमबासीले लामो समयदेखि देख्दै आएको फाप्लामा रंगशाला बनाउने सपना साकार हुने कुराको सुरुवाती बैठकको रुपमा औल्याउँदै यस सपना साकार गर्न सबै तहका सरकार तथा आम जनताको सहयोगका लागि अपिल गरे । 

युवा तथा खेलकुद मन्त्रालयका सचिव डा. दमोदर रेग्मीले पूर्वाधार निर्माण सम्बन्धि जारी गठन आदेशले नेपालमा विकास पूर्वाधार निर्माणको नयाँ मोडल परिकल्पना गरेकाले यो पूर्वाधार निर्धारित समयमा बन्ने कुरामा आफू ढुक्क रहेको बताए । 

समितिका नवनियुक्त कार्यकारी निर्देशक शेर बहादुर बि.सी.ले सुदूरपश्चिम क्षेत्रको विकासमा कोशेढुंगा सावित हुने पूर्वाधार निर्माण सम्बन्धि परियोजनाको मुख्य जिम्मेवारी सम्हाल्न पाउँदा खुशी लागेको बताउँदै यस अवसर र चुनौतीको सही सदुपयोग गर्दै समयमै सम्पन्न गर्ने प्रतिबद्धता जनाए ।