नवौं राष्ट्रिय खेलकुदका लागि ६० करोड बजेट स्वीकृत

काठमाडौं । गण्डकी प्रदेशमा आयोजना हुने नवौं राष्ट्रिय खेलकुदका लागि ६० करोडको बजेट स्वीकृत भएको छ ।

राष्ट्रिय खेलकुद परिषदका सदस्य सचिव टंकलाल घिसिङले नवौं राष्ट्रिय खेलकुदका लागि ६० करोडको बजेट अर्थमन्त्रालयबाट स्वीकृत भएको जानकारी दिएका हुन् ।

नवौं राष्ट्रिय खेलकुद मुल आयोजक कमिटी बैठकको उद्घाटनमा बोल्दै सदस्य सचिव घिसिङले माग गरेवापतको बजेट स्वीकृत भएको बताए ।

सदस्य सचिव घिसिङले प्रतियोगिताको मिति सरेपनि बजेट नघटेको जानकारी गराए ।

'नवौं राष्ट्रिय खेलकुद प्रतियोगिताका लागि ६० करोडको बजेट अर्थमन्त्रालयबाट स्वीकृत भएको छ,' घिसिङले भने ।

राखेपले प्रतियोगिताका लागि ६० करोडको बजेट प्रस्ताव गरेको थियो ।

नवौं राष्ट्रिय खेलकुद असोज २८ देखि कात्तिक ३ गतेसम्म आयोजना हुँदैछ ।

यस अघि जेठ २२ देखि २८ सम्म हुने तालिका रहेको थियो । तर स्थानीय चुनाव, सार्वजनिक खरिद ऐन, विद्यार्थीको परिक्षा, वर्षाको मौसम र आवश्यक तयारी नपुग्ने लगायतका विभिन्न कारण देखाउँदे प्रतियोगिता सारिएको हो ।