काठमाडौं । पाल्पा जिल्ला फुटबल संघले नयाँ आर्थिक वर्षका लागि योजना तर्जुमा गरेर फुटबल कार्यक्रम अघि बढाउने भएको छ । जिल्ला फुटबल संघको नेतृत्व परिवर्तनसँगै नयाँ कार्यसमितिले वार्षिक योजनानै बनाएर फुटबल कार्यक्रम जिल्लाभर सञ्चालन गर्ने निर्णय गरेको हो ।
संघले गत आईतबार वार्षिक योजना तर्जुमाका लागि गोष्ठिनै आयोजना गर्यो । जिल्लालाई तीन क्षेत्रलाई विभाजन गरेर सहभागीले आ आफ्नो क्षेत्रबाट योजना प्रस्तुत गरेका थिए । तीन क्षेत्रबाट प्राप्त योजना र सुझावलाई नयाँ आर्थिक वर्षमा समग्र जिल्लाको फुटबल कार्यक्रमको रुपमा अघि बढाउने निर्णय जिल्ला फुटबल संघले गरेको छ ।
पाल्पाको तासेनमा मात्र केन्द्रित फुटबल गतिविधिलाई तीन क्षेत्र विभाजन गरेर माडी र रामपुरलाई समेत योजना, कार्यक्रममा समावेश गरेको छ । बैठकले तीन वटै क्षेत्रमा ग्रासरुट प्रशिक्षणलाई प्राथमिकतामा राखेर नियमित प्रशिक्षणलाई निरन्तरता दिने निर्णय गरेको छ । यस्तै, पाल्पा जिल्ला फुटबल संघको भवन तथा एन्फा पार्क निर्माणका लागि प्रक्रिया अघि बढाउने र तीन वटै क्षेत्रका खेल मैदानका लागि स्तरोन्नतीको निर्णय भएको छ ।
बैठकले जिल्ला संघमा आबद्ध भएका क्लब र तीनका पदाधिकारीको क्षमता अभिवृद्धि तालिम सञ्चालन गर्नेदेखि प्रदेश खेलकुद विकास परिषदसँग सहकार्य गरेर प्रदेश तथा छिमेकी जिल्लाका क्लबको सहभागीतामा प्रतियोगिता सञ्चालन गर्ने निर्णय गरेको छ । संघले स्थानीय सरकारसँग सहकार्य गरेर ब्यापक रुपमा जिल्लाभरी फुटबल विकासका कार्यक्रम सञ्चालन गर्ने योजना सार्वजनीक गरेको छ ।
जिल्ला फुटबल संघको नयाँ नेतृत्वको रुपमा आएका अध्यक्ष प्रणय बिरगंज राणाले जिल्ला सदरमुकाममा मात्र केन्द्रित फुटबललाई जिल्लाभर लैजाने लक्ष्य सहित कार्यक्रम तयार पारिएको बताउँछन् ।
‘तानसेनमा मात्र फुटबल गतिविधि केन्द्रित भैरहेको अवस्थामा जिल्लालाई तीन क्षेत्रमा विभाजन गरेर माडी र रामपुरमा समेत कार्यक्रम सञ्चालन गर्ने निर्णय गरेका छौं । यसले जिल्लाभर फुटबलका गतिविधि बढ्नुका साथै खेलाडी उत्पादनमा समेत सहयोग पुग्ने अपेक्षा गरेका छौं ।’ उनले भने ।
अध्यक्ष राणाले ग्रासरुट, नियमित प्रशिक्षण, पूर्वाधार र प्रतियोगितामा जिल्ला फुटबल संघ केन्द्रित भएर काम गर्ने बताउँछन् ।
जिल्लामा यति धेरै कार्यक्रम गर्ने स्रोतको ब्यवस्थापन कसरी गर्नुहुन्छ त ? भन्ने प्रश्नमा राणा भन्छन्, ‘हामीलाई एन्फा, संघीय सरकार, प्रदेश र स्थानीय सरकारसँग धेरै अपेक्षा छन् । एन्फाले राम्रो कार्यक्रम र स्रोत उपलब्ध गराएको खण्डमा जिल्ला फुटबलको स्तरलाई माथि उकास्न हामी कोशिश गर्नेछौंं । नीजि क्षेत्रलाई आकर्षित गरेर जिल्लामा धेरै भन्दा धेरै कार्यक्रम सञ्चालन गर्ने योजना छ ।’
फुटबलमा जिल्ला संघको काम केन्द्रबाट प्राप्त बजेट र कार्यक्रम सम्पन्न गर्ने तर स्रोत व्यवस्थापन गरेर जिल्लामा कार्यक्रम गर्ने प्रचलन एकदमै कम छ । केही जिल्लाले मात्र प्रदेश र स्थानीय सरकारसँग मिलेर जिल्लामा फुटबल गतिविधिलाई चलायमान र नतिजामुखी बनाएका छन् ।
