काठमाडौं । बुद्धिचाल संघको चुनावी साधारण सभा भोलि (शुक्रबार) सुरु हुदैछ । कोभिडका कारण स्थगित हुदै आएको संघको चुनावी साधारण सभा भोलि सुरु हुन लागेको हो ।
काठमाडौंको जमलस्थित एक होटेलमा सुरु हुने साधारण सभाको शुक्रबार उद्घाटन हुनेछ । शनिबार चुनावी प्रक्रिया सम्पन्न गरेर साधारण सभा सम्पन्न हुनेछ ।
संघको ३१ सदस्यीय नयाँ नेतृत्वका लागि छलफल उत्कर्षमा छ । वर्तमान अध्यक्ष एकलाल श्रेष्ठले नेतृत्व छाड्ने प्रस्ट पारिसकेका छन् । सोही कारण संघमा नयाँ नेतृत्व आउने पक्का पक्की जस्तै छ ।
नयाँ नेतृत्वका लागि संघका वरिष्ठ उपाध्यक्ष विधुर प्रसाद गौतमले औपचारिक रुपमा उम्मेदवारी घोषणा गरिसकेका छन् ।
संघमा सर्वसम्मत रुपमा नेतृत्व चयन गर्ने संघको तयारी छ । सहमती बन्न नसकेमा चुनाव मार्फत नयाँ नेतृत्व चयन हुनेछ ।
पछिल्लो पटक २०७२ साल चैत १३ गते संघको केन्द्रिय निर्वाचन भएको थियो । चार वर्षे कार्यकाल सकिएपछि २०७६ साल चैत २८ गते चुनावी साधारण सभाको मिति तोकिएको थियो । तर कोभिडको प्रकोप र नयाँ ऐनका कारण संघको निर्वाचन सम्भव भएन । तर ऐनलेनै दुई वर्षभित्र प्रदेश, स्थानीय तह र केन्द्रिय तहमा दर्ता हुने बाध्यकारी व्यवस्था गरेपछि संघ निर्वाचनमा होमिएको हो ।
संघका २९ वटा सदस्य जिल्ला रहेका छन् । सात प्रदेशमा संघले उपस्थिती देखाएपनि ६ वटा प्रदेशमा संघले प्रादेशिक संघ दर्ताका लागि प्रक्रिया सुरु गरेको छ ।
संघका कार्यसमिति सदस्य उमेश केसीले साधारण सभाको तयारी अन्तिम चरणमा पुगेको जानकारी दिए । उनले सहमतीनै नयाँ नेतृत्व चयनका लागि आन्तरिक गृहकार्य भैरहेको बताएका छन् ।
निर्वाचननै भएको अवस्थामा २९ जिल्लाबाट दुई जनाका दरले प्रतिनिधि र हरेक प्रदेशमा एक महिला सहित तीन जना, वर्तमान कार्यसमितिका ३१ जना, दुई टेक्निकल सदस्य र दुई पछिल्लो नेपाल च्याम्पियन सहित १ सय १४ जना मतदानमा सहभागी हुनेछन् । एक जना कार्यसमिति सदस्यले राजीनामा दिएकाले १ सय १३ भोटले संघको नयाँ नेतृत्व चयन गर्नेछ ।
