नेम्वाङबाट गणेश थापा समूह अलग !

काठमाडौं । अखिल नेपाल फुटबल संघ (एन्फा) निर्वाचनको महिना दिन पनि नबित्दै अध्यक्ष पंकजबिक्रम नेम्वाङबाट गणेश थापा समूह अलग भएको छ । तत्कालिन अध्यक्ष कर्माछिरिङ शेर्पालाई हराउन चुनावी गठबन्धन गरेका नेम्वाङ र गणेश थापा समूह निर्वाचनको साता दिनपनि नबित्दै फरक बाटो हिड्ने निष्कर्षमा पुगेका हुन् । 

आफुसँग सल्लाह नगरि महासचिवमा किरण राईलाई नियुक्त गरिएकोमा गणेश थापाको असन्तुष्टि छ । एन्फामा शपथ लिन गएका कार्यसमितिका नवनिर्वाचित पदाधिकारीलाई आकस्मिक रुपमा बैठक राखेर नेम्वाङले महासचिवमा राई र कोषाध्यक्षमा रबिन्द्र जोशीलाई नियुक्त गरेका थिए । उनले अन्तराष्ट्रिय सम्बन्ध विभागको जिम्मेवारी नबिन पाँडेलाई दिएका थिए । विधान विपरित पाँडेलाई जिम्मेवारी दिने नेम्वाङको निर्णयको चर्को आलोचना भएको छ । 

पाँडे नियुक्तिको एन्फाका पूर्व अध्यक्ष गणेश थापाले समेत विरोध गरेका थिए । आफुसँग सल्लाह नगरि राईलाई महासचिव नियुक्त गर्ने नेम्वाङको निर्णयमा थापा असन्तुष्ट छन् । निर्णयको भोलिपल्टै उनले बैठक बोलाएर सो निर्णयको विरोध गरेका थिए । 

चुनाव जिते लगत्तै नेम्वाङ र थापा समुहले बेग्ला बेग्लै गुटगत छलफल चलाएका थिए । थापा समूहले मापदण्ड बनाएर मात्र महासचिव सहितका पदाधिकारी मनोनित गर्ने रणनीति बनाएको थियो । यस रणनीतिले महासचिव नियुक्तिको प्रक्रिया ढिलाई हुने सो समूहको बुझाई थियो । थापा निकट स्रोतका अनुसार गणेश थापा मापदण्ड बनाएर एएफसीमा काम गरेका आफ्नो छोरा गौरव थापालाई महासचिव बनाउने योजनामा थिए । तर नेम्वाङले आकस्मात बैठक राखेर उदयपुरका माओवादी नेता पृष्ठभुमीका राईलाई महासचिवको जिम्मेवारी दिए । 

एजेण्डा बिनै बैठकमा विषय प्रवेश गराएर महासचिव लगायतका महत्वपुर्ण निर्णय गराउन खोजेको भन्दै बैठकमा केही सदस्यले असन्तुष्टि जनाएका थिए । छलफल गरेर मात्र यस्तो गम्भिर विषयमा निर्णय लिनुपर्ने केही सदस्यले माग गरेका थिए । तर नेम्वाङले महासचिव नभएको अवस्थामा सचिवालयको काम लथालिङ्ग हुने भन्दै आफुलाई सहज बनाईदिन बैठकमा अनुरोध गरेका थिए । 

‘चुनाव जितेर आएका नयाँ अध्यक्षलाई पहिलो बैठकमै गाह्रो बनाउँदा राम्रो सन्देश जादैन भन्ने भयो । तर एजेण्डा समेत नदिएर, छलफल समेत नगरि अध्यक्षले ठाडो प्रस्तावमा महासचिव सहितका पदाधिकारी नियुक्ति गर्नुभयो । पहिलो बैठकमै अध्यक्षले गलत कार्यशैली प्रर्दशन गर्नुभयो’ कार्यसमितिका एक सदस्यले खेलपाटीसँग भने । 

एन्फा विधानमै कार्यसमिति बैठक हुनुभन्दा ७ दिन अगावै कार्यसमितिका सदस्यलाई बैठकबारे लिखित जानकारी दिनुपर्ने उल्लेख छ । विशेष परिस्थितिमा अध्यक्षले कार्यसमितिको आपतकालिन बैठक बोलाउन सक्ने र त्यस्तो बैठकमा ७ दिने सुचना र बिषयसूचिको प्रावधान लागु नहुने उल्लेख छ । नेम्वाङले बिना जानकारी र बिना एजेण्डा राखेको पहिलो बैठकमै महासचिव, कोषाध्यक्ष लगायतका महत्वपुर्ण नियुक्तिको निर्णय गराएका छन् । चुनाव अघि उनी आफै अध्यक्षले एकलौटी निर्णय गर्ने गरेको भन्दै विरोधमै मात्र उत्रिएर सम्पुर्ण कार्यकाल गुजारेका थिए । 

महासचिव नियुक्तिमात्र हैन कोषाध्यक्ष र अन्तराष्ट्रिय सम्बन्ध प्रमुखको नियुक्तिको निर्णयपनि विवादमा परेको छ । चुनाव अघि आफैले आर्थिक अनियमितता आरोप लगाएका कोषाध्यक्षबाट हटाउन माग गर्दै आएका रबिन्द्र जोशीलाई नेम्वाङले निर्वाचित भएपछि सोही जिम्मेवारी दिएका छन् । तत्कालिन कोषाध्यक्ष र महासचिवले व्यापाक आर्थिक अनियमितता र अपचलन गरेको आरोप सहित बारम्बार उजुरी गरेर नेम्वाङले फिफाबाट अनुसन्धानका लागि प्रतिनिधि बोलाएका थिए । तर निर्वाचन लगत्तै उनै विवादमा परेका कोषाध्यक्षलाई सोही जिम्मेवारी सुम्पिएका छन् । 

विधान विपरित अन्तराष्ट्रिय सम्बन्ध प्रमुखमा नियुक्त गरिएका पाँडेको विषयलाई गणेश थापा पक्षले मुख्य मुद्धानै बनाउने भएको छ । नियुक्तिको निर्णय बसेको बैठकमा थापा र पाँडेबीच चर्काचर्कीनै परेको थियो । दुवैले निर्वाचनमा आफ्नो भुमिका निर्णायक रहेको दाबी गरेका थिए । सोही झगडापछि थापाले पाँडेलाई फेसबुकबाट ‘ब्लक’ समेत गरेको बैठकमा सहभागी एक नेताले जानकारी दिए । शेर्पालाई हराउन सुरु भएको थापा र पाँडेको जुगलबन्दी चुनाव लगत्तै ‘वार पार’को अवस्थामा पुगेको छ । 

भ्रष्टाचारको आरोपमा १० वर्षको प्रतिबन्धमा परेका एन्फाका पूर्व अध्यक्ष गणेश थापाले एन्फा निर्वाचनमा आफु निकटका जिल्ला र क्लबका उम्मेदवारलाई नेम्वाङ समूहबाट चुनावी मोर्चामा उतारेका थिए । अध्यक्षमा नेम्वाङले जितेपनि सो समूहबाट अधिकांश गणेश थापा निकट उम्मेदवार विजयी बनेका छन् । नेम्वाङसँग उपाध्यक्ष जितेका दावा लामा र महिला सदस्य सरिला श्रेष्ठमात्र छन् । तत्कालिन अध्यक्ष शेर्पालाई हराउन नेम्वाङलाई प्रयोग गरेका थापा एन्फामा बलियो अवस्थामा पुगेपछि फरक ‘मुभ’ बनाउने रणनीतिमा जुटेका छन् । सोही अनुसार उनले चुनावमा पराजित बनेको समूहसँग भेटघाट र संवादलाई तिव्र बनाएका छन् । थापाले शेर्पा निकटका पदाधिकारीलाई फोन गरेर मिलेर जाने इच्छा देखाई रहेका छन् । थापाको पछिल्लो मुभले नेम्वाङसँग उनको समूहको दुरी बढेको संकेत प्रस्टसँग गर्छ । 

महासचिव फुस्किएपनि एन्फामा प्रमुख कार्यकारी अधिकृत (सिइओ)मा छोरा गौरवलाई ल्याउने थापाको जोड छ । प्रवक्ताको जिम्मेवारीमा सुरेश साहलाई दिनुपर्ने थापाको अडान छ । तर प्रवक्तामा नेम्वाङ पक्षका बद्री भट्टराईलाई अघि सार्दा उपयुक्त हुने भन्दै पाँडेले लबिङ गरिरहेका छन् । भट्टराई उनै व्यक्ति हुन्, जसले एन्फा चुनावमा निर्वाचन समितिमा रहेर शेर्पा पक्षका चार भोटलाई बदर गराउन महत्वपुर्ण भुमिका खेलेका थिए । शेर्पाको कार्यकालमा भट्टराईलाई फुटसल कमिटीको संयोजक नदिएको झोकमा पाँडेले शेर्पासँग सम्बन्ध बिच्छेद गरेका थिए । 

नेम्वाङ पक्षिय नेता पनि निरन्तर कर्मा छिरिङ शेर्पा निकट नेतासँग सम्पर्कमा छन् । दुवै पक्ष शेर्पासँग मिलेर एन्फामा आफु अनुकुलका पदाधिकारी र नियुक्ति गर्ने दाउमा छन् । चुनावी ‘ह्याङ’बाट उत्रि नसकेका शेर्पा दुवै पक्षलाई ‘इग्नोर’ गरिरहेका छन् ।