'तत्काल नेपाल आउने अवस्था छैन'

काठमाडौं । अखिल नेपाल फुटबल संघ (एन्फा)ले मुख्य प्रशिक्षक अब्दुल्लाह अलमुताईरीसँग सम्पर्क गरेर आगामी सहकार्यको विषयमा छलफल गरेको छ । नवनिर्वाचित कार्यसमितिको निर्णय अनुसार एन्फाले मुख्य प्रशिक्षिक अलुमताईरीसँग सम्पर्क गरेर छलफल अघि बढाएको हो । 

एन्फा कार्यसमितिले खेलाडी प्रशिक्षक विवादको छानविन प्रतिवेदन अनुसार प्रशिक्षकको सन्दर्भमा कतार फुटबल संघसग समन्वय गरि प्रतिवेदन कार्यान्वयन गर्न सचिवालयलाई निर्देशन दिएको थियो । सोही अनुसार सचिवालय प्रमुख तथा महासचिव किरण राईले मुख्य प्रशिक्षकसँग सम्पर्क गरेर आगामी सहकार्यको विषयमा छलफल गरेका हुन् । 
एन्फाको प्रवक्ताको जिम्मेवारी समेत पाएका महासचिव किरण राईले प्रशिक्षकसँग सम्पर्क भएको र कुराकानी अघि बढेको खेलपाटीलाई बताए । 

‘प्रशिक्षकसंग सम्पर्क भएर कुराकानी भएको छ । उहाँले आफु स्वास्थ्य उपचारको क्रममा रहेको बताउनुभएको छ । नेपाल आउने समय लाग्ने जानकारी गराउनुभएको छ ।’ राईले भने, ‘उहाँ नेपाल आएपछि त्रिपक्षिय सम्झौता हेरेर, सबैसँग छलफल गरेर निष्कर्शमा पुग्नेछौं ।’ 

‘प्रारम्भिक छलफल भएको छ । तत्काल नेपाल आउन सक्ने अवस्था छैन भन्नु भएको छ ।’ राईले भने, ‘उहाँलाई निरन्तरता दिने÷नदिने भन्ने टुङ्गोमा पुगिएको छैन । प्रशिक्षकको विषय त्रिपक्षिय रहेकाले नेपाल फर्किएपछि सबैजना सँगै बसेर टुङ्गोमा पुग्नुपर्नेछ ।’ 

एन्फामा नयाँ नेतृत्व आउने वित्तिकै प्रशिक्षक अलमुताईरीले नेपाल नफर्कने संकेत गर्दै ‘स्टोरी’ सेयर गरेका थिए । शनिबार भने उनले विश्वकप २०२६, एसियन कप २०२७ छनोट र साफ कप २०२३ अर्को लक्ष्य रहेको भन्दै ‘स्टोरी सेयर’ गरे । पछिल्लो ‘स्टोरी’ले नेपाली टिमको जिम्मेवारीलाई निरन्तरता दिन अलमुताईरी इच्छुक रहेको देखिएको छ ।   
अलमुताईरीसँग सम्पर्क गर्दै महासचिव राईले ‘कोचिङ प्लान’ माग गरेका थिए । अलमुताईरीले समेत सेप्टेम्बरसम्मको कोचिङ प्लान एन्फालाई पठाएका छन् । 

प्रशिक्षणको व्यवस्थापनको विषयलाई लिएर अलमुताईरी र सिनियर १० खेलाडीबीच विवाद उत्पन्न भएको थियो । प्रशिक्षक अलमुताईरीले उपकप्तान रोहित चन्द सहित १० खेलाडीलाई राष्ट्रिय टिमबाट बाहिर निकालेका थिए । 
घटनाबारे छानविन गर्न गठित कार्यदलले प्रशिक्षकले एकलौटी र स्वेच्छाचारी रुपमा काम गर्ने प्रवृत्ति बढ्दै गएको हुदाँ ‘चेन अफ कमान्ड’ अनुसार काम गर्न निर्देशित गरेको थियो । 

कार्यदलले प्रशिक्षकको स्वास्थ्य र मानसिक अवस्था, फरक सामाजिक र सांस्कृतिक परिवेश, बारम्बार विवाद र सामाजिक संजालमा अनावश्यक टिकाटिप्पणीले गर्दा राष्ट्रिय टिममा स्वच्छ वातावरण नभएको उल्लेख गर्दै एसिया कप छनोटपछि कतार एफएसँग सहमती कायम गरेर प्रशिक्षकको विकल्प खोज्न सिफारिस गरेको थियो । 

एसिया कप छनोट लगत्तै एन्फामा नयाँ नेतृत्व आएको छ । तर नयाँ नेतृत्वले राष्ट्रिय टिमबाट बाहिर निकालिएका खेलाडीलाई स-सम्मान प्रशिक्षणमा फिर्ता बोलाउँदै प्रतिवेदन अनुसार प्रशिक्षकको हकमा प्रशिक्षक, कतार फुटबल संघसंग समन्वय गरि कार्यान्वयन गर्न सचिवालयलाई निर्देशन दिएको छ ।