सागका स्वर्णधारीलाई गोदावरीले आजीवन भत्ता दिने   

काठमाडौं । गोदावरी नगरपालिकाले दक्षिण एसियाली खेलकुद (साग) मा स्वर्ण पदक विजेता खेलाडीलाई आजीवन भत्ता दिने निर्णय गरेको छ ।

गोदावरी नगरपालिकाको ११ औं नगरसभाको निति तथा कार्यक्रम पारित गर्दै  सागका स्वर्णधारीलाई आजीवन पाँच हजार मासिक भत्ता प्रदान गर्ने निर्णय गरेको हो ।  

नगर प्रमुख गजेन्द्र महर्जनको अध्यक्षतामा  शुक्रबार सम्पन्न नगरसभाले उक्त निर्णय गरेको छ ।

गोदावरी नगरपालिकामा दुई जना सागका स्वर्णधारी खेलाडी छन् ।

गोदावरी नगरपालिकाका स्थायिबासी करातेका दीपक श्रेष्ठ र गंगाराम महर्जनले सागमा स्वर्ण पदक जितेका छन् ।

नेपाल राष्ट्रिय तथा अन्तर्राष्ट्रिय खेलाडी संघ (एनएनआईपीए) का अध्यक्ष समेत रहेका श्रेष्ठले नगरपालिकाको उक्त निर्णयको स्वागत गरेका छन् ।

अग्रज खेलाडीलाई सम्मान र नयाँ खेलाडीलाई प्रोत्साहन गर्ने उदेश्यले गरिएको उदाहरणनीय निर्णयका लागि श्रेष्ठले नगर प्रमुखलाई धन्यवाद दिएका छन् ।