​लुकाकु फर्कनेमा इन्टर आशावादी  

काठमाडौं । इटालियन क्लब इन्टर मिलानले बेल्जियमका फरवार्ड रोमेलु लुकाकु क्लब फर्कनेमा आशा राखेको छ ।

इंग्लिस क्लब चेल्सीले लोनमा अनुबन्धका लागि गरेको प्रस्ताव अस्विकार गरेपनि इन्टर लुकाकु अनुबन्धित हुनेमा आशावादी देखिएको छ  ।

२९ वर्षीय लुकाकु अनुबन्धका लागि पछिल्लो समय सिरी ए क्लब इन्टरले निकै चाँसो देखाएको छ ।

लुकाकु पनि इन्टर फर्कन चाहिरहेका छन् । उनले यस अघि एक अन्तर्वार्तामा चेल्सीमा खुशी नभएको र इन्टर मिलान फर्कन चाहेको अभिव्यक्ति दिएका थिए ।

लुकाकु गत वर्ष इन्टरबाट क्लबको कीर्तिमानी ९७.५ मिलियन पाउण्डमा चेल्सीमा पुन: अनुबन्धित भएका थिए । लुकाकुले चेल्सीसँग पाँच वर्षको सम्झौता गरेका थिए ।

लुकाकु सात वर्षपछि चेल्सी फर्किएका थिए । लुकाकुले सन् २०१४ मा चेल्सी छाडेका थिए ।  

चेल्सी छाडेर लुकाकु एभर्टन गएका थिए । एभर्टनबाट सन् २०१४ देखि २०१७ सम्म उनले १ सय ६६ खेलमा ८७ गोल गरेका थिए ।

सन् २०१७ मा म्यानचेस्टर युनाईटेडमा अनुबन्धित भएका लुकाकुले ओल्डट्राफोर्ड बसाईमा ९६ खेल खेल्दै ४२ गोल गरेका थिए ।

युनाईटेडपछि  लुकाकु  सन् २०१९ मा इन्टर मिलानमा अनुबन्धित भएका थिए ।