चुनावी मैदानमा मछिन्द्र र मनाङ !

काठमाडौं । सधै मैदानमा देखिने मछिन्द्र र मनाङको प्रतिस्पर्धा यस पटक चुनावसम्मै तन्किएको छ ।

अखिल नेपाल फुटबल संघ (एन्फा)को नयाँ नेतृत्वका लागि असार ६ गते निर्वाचन हुदैछ । घरेलु फुटबलका दुई ठुला क्लब मछिन्द्र र मनाङ चुनावी प्रतिस्पर्धामा आमने सामने हुदैछन् । मैदानमा मात्र देखिने दुई क्लबको चुनावी प्रतिस्पर्धा फुटबलको नेता बन्ने दौडसम्म आईपुगेको छ । 

मछिन्द्र क्लबका अनिल श्रेष्ठ र मनाङ क्लबका विजय घले चुनावी प्रतिस्पर्धामा छन् । दुवै जना फरक प्यानलबाट केन्द्रिय कार्यसमिति सदस्यका लागि भिड्दैछन् । मछिन्द्रका अनिलले वर्तमान अध्यक्ष कर्माछिरिङ शेर्पाको प्यानल रोजेका छन्, मनाङका विजय वरिष्ठ उपाध्यक्ष पंकजबिक्रम नेम्वाङ प्यानलमा पुगेका छन् । विजयले यसअघि शेर्पा प्यानलबाट केन्द्रिय सदस्य जितेका थिए । नेतृत्वसँग असमझदारी बढेसँगै उनी शेर्पाबाट टाढिए । अनिल पहिलो पटक एन्फाको चुनावमा सहभागी हुदैछन् ।

पछिल्लो समय घरेलु फुटबलको सबैभन्दा ठुलो क्लब हो, मछिन्द्र । लगातार दुई पटक लिग उपाधि जित्दै मछिन्द्रले घरेलु फुटबलमा आफुलाई नयाँ शक्तिको रुपमा उभ्याएको छ । मछिन्द्रको यस सफलताका मुख्य मास्टरमाइन्ड हुन्, अनिल श्रेष्ठ ।

व्यवसायीक रुपमा ठुला प्रायोजकलाई क्लबमा छिराएर फुटबलको नयाँ शक्तिको रुपमा उनले मछिन्द्रलाई उभ्याएका छन् । फुटबलप्रतिको लगाव र प्रतिबद्धताले मछिन्द्रलाई घरेलु फुटबलको नम्बर एक क्लब बनाएको छ । नेपाली फुटबल र एन्फाको कार्यशैलीबाट असन्तुष्ट अनिलले यस पटक आफै फुटबल संघ छिर्ने निर्णय गरे । क्लबले उनलाई शेर्पा प्यानलबाट केन्द्रिय सदस्यको उम्मेदवार बनाउने निर्णय गर्यो । उनी एन्फा छिरेर क्लब फुटबल र राष्ट्रिय फुटबललाई बलियो बनाउने चाहना रहेको बताउँछन् ।

‘जबसम्म क्लब फुटबल राम्रो बन्दैन, देशको राष्ट्रिय टिम बलियो हुदैन । खेलाडीलाई अधिकतम भन्दा अधिकतम सुविधा दिएर लिगलाई व्यवस्थित गर्न सकियो भने फुटबलको विकास गर्न सकिन्छ भन्ने लाग्छ । एन्फामा मौका पाएभने मेरो प्रयास त्यही रहन्छ ।’ उनले खेलपाटीसँग भने । 

एन्फा चुनावमा मनाङसँगको प्रतिस्पर्धाको विषयमा अनिल भन्छन्, ‘दुवै क्लब फुटबललाई कसरी राम्रो बनाउन सकिन्छ भनेर प्रयास गरिरहेका छौं । एनएसएलको विवादको दौरान विजयले क्लबको पक्षमा अडान राखे । मैदानको प्रतिस्पर्धा एउटा विषय हो, दुवै क्लब र उम्मेदवारको सोच फुटबल राम्रो बनाउनेनै हो । त्यसैले लागि हामीले मेहनत गरिरहेका छौं ।’

घरेलु फुटबलमा मनाङ सबैभन्दा सफल क्लब हो । कीर्तिमानी लिग उपाधि उसैले जितेको छ । मनाङ घरेलु फुटबलमा एउटा लिगेशी बोक्छ । मैदानमा मनाङको आफ्नै परिचय र योगदान छ । त्यही मनाङले फुटबलको नेताको रुपमा अघि बढाउन चाहेको नाम विजय घले हो । उनी दोस्रो पटक एन्फाको केन्द्रिय सदस्यमा दाबेदारी प्रस्तुत गर्दैछन् ।

अघिल्लो पटक उनी शेर्पा प्यानलबाट केन्द्रिय सदस्य जितेका थिए । यसपटक परिस्थिती फरक बन्यो । चैतमा एनएसएलको आयोजनाको विवाद निकैनै चर्कियो । एन्फाले घरेलु फुटबलको तालिकालाई व्यवस्थापन गर्न नसक्दा एनएसएलको चेपुमाका काठमाडौंका ठुला क्लब परे । आफुलाई बाईपास गरेर आफ्ना क्लबका खेलाडी अर्को लिगले लैजादै गर्दा घले चुप बस्न सकेनन् । एन्फा नेतृत्वसँग उनको चर्काचर्कीनै पर्यो । समस्यालाई नेतृत्वले ठिक ढङ्गले व्यवस्थापन गर्न नसकेको भन्दै उनले विरोध गरे । त्यही विवादले राजनीतिक रुप लियो, दुवैलाई फरक कित्तामा उभ्याईदियो । ‘आफ्नो व्यवस्थापन र फाईदाका लागि नेतृत्वसँग मिलेर बस्न सकिन्थ्यो होला तर क्लबको भविष्यका लागि सम्झौता गर्न मनले मानेन । त्यही भएर फरक कित्तामा उभिने निर्णय लिए ।’ घले भन्छन् । 

मछिन्द्रसँगको प्रतिस्पर्धाको सन्दर्भमा घले भन्छन्, ‘दुवै फुटबलको विकासमा समर्पित क्लब हुन् । दुवैले क्लब फुटबललाई राम्रो र सफल बनाउन सहयोग गरिरहेका छौं । मछिन्द्रले समेत पछिल्लो समय फुटबलमा राम्रो प्रगति गरेको छ । त्यसैले राम्रो मान्छे फुटबलमा आउनु सुखद कुरा हो ।’