यू-१९ विश्वकप छनोट : नेपाल र मलेसिया भिड्दै

काठमाडौं । आईसीसी यू-१९ महिला टी-ट्वान्टी विश्वकप एसिया छनोट अन्तर्गत नेपालले आज बिहीबार आयोजक मलेसियासँग प्रतिस्पर्धा गर्दैछ ।

मलेसियाको युकेएम ओभलमा नेपालले अन्तिम खेलको रुपमा मलेसियाको सामना गर्न लागेको हो । नेपाल र मलेसियाबीचको खेल बिहान ७:१५ बजे सुरु हुनेछ ।

नेपालको विश्वकप सपना भने समाप्त भईसकेको छ । तर, नेपाल आज मलेसियालाई हराएर छनोटमा सुखद अन्त्य गर्न चाहन्छ ।

अघिल्लो ४ खेलमा नेपालले दुई जित र दुई हार व्यहोरेको छ।

नेपालले पहिलो खेलमा कतारलाई ७९ रनले हराएको थियो । तर, दोस्रो खेलमा ८ रनमा अलआउट भएको नेपाल युएईसँग १० पराजित भएको छ ।

तेस्रो खेलमा नेपालले भुटानलाई ४ विकेटले हराएको थियो । चौंथो खेलमा नेपाल थाइल्याण्डसँग ४९ रनले पराजित भएको थियो ।

नेपाल ४  खेलमा ४ अंक जोडेर तेस्रो स्थानमा रहेको छ ।

मलेसिया ४ खेलमा ४ अंक जोडेर चौंथो स्थानमा रहेको छ ।

मलेसिया पनि नेपाललाई हराएर छनोटको सुखद अन्त्य गर्न चाहन्छ ।

छनोटमा नेपालसहित, आयोजक मलेसिया, युएई, थाइल्याण्ड, भुटान र कतार रहेका छन् । शीर्ष टोलीले दक्षिण अफ्रीकामा आयोजना हुने यू-१९ को विश्वकप खेल्नेछ ।

छनोटमा युएई ८ अंक जोडेर शीर्ष स्थानमा रहेको छ । थाइल्याण्ड ८ अंक जोडेर दोस्रो स्थानमा रहेको छ ।