अग्रता जोगाउन नसक्दा हार्यो एभर्टन  

काठमाडौं । इंग्लिस प्रिमियर लिग फुटबलमा एभर्टनले हार व्यहोरेको छ ।

आइतबार राति ९ खेलाडीमा समेटिएको एभर्टनलाई ब्रेन्टफोर्डले ३-२ गोल अन्तरले हराएको हो ।

घरेलु मैदानमा सुरुआती अग्रता जोगाउन नसक्दा एभर्टनले हार व्यहोरेको हो ।

खेलको दशौँ मिनेटमा डोमिनिक लेविनले गोल गर्दै एभर्टनलाई अग्रता दिलाएका थिए ।

१८ औं मिनेटमा जरार्ड ब्रान्थवेटले रातो कार्ड पाएपछि एभर्टन १० खेलाडीमा समेटियो ।

कोलम्यानले ३७ औं मिनेटमा आत्मघाती गोल गरेपछि ब्रेन्टफोर्ड १-१ गोलको बराबरीमा फर्कियो ।

पहिलो हाफको इन्जुरी समयमा रिचार्लीसनले पेनाल्टीबाट गोल गर्दै एभर्टनलाई २-१ को अग्रता दिलाए ।

खेलको ६२ औं मिनेटमा योअने विसाले गोल गर्दै ब्रेन्टफोर्डलाई २-२ गोलको बराबरीमा ल्याए ।

त्यसपछि खेलको ६४ औं मिनेटमा रिको हेनरीले गोल गर्दै ब्रेन्टफोर्डलाई ३-२ को जित दिलाए ।

यस्तै खेलको ८८ औं मिनेटमा सालोमोन रोनडोनले रातो कार्ड पाएपछि एभर्टन ९ खेलाडीमा समेटिएको थियो ।

यस हारसँगै एभर्टनले ३६ खेलमा ३६ अंक जोडेको छ ।

एभर्टन १६ औं स्थानमा रहेको छ ।

ब्रेन्टफोर्ड ४६ अंक जोडेर ११ औं स्थानमा रहेको छ ।