डेम्बेला अब ‘एसिस्ट-म्यान’

काठमाडौं । कसको भाग्य कति बेला कसरी फेरिनेछ, त्यो थाहै हुन्न । यो बार्सिलोना र यसका फ्रान्सेली खेलाडी ओसमन डेम्बेला दुवैमा लागू हुन्छ । प्रशिक्षकमा ज्याभी आउन अगाडि बार्सिलोनाको स्थिति कस्तो थियो, सबैलाई थाहा छ । डर थियो, कतै यो जत्तिको टिम पनि रेलिगेसनमा त पर्ने होइन् ? तर ज्याभी के आयो, बार्सिलोनामा पुर्नजागरण सुरु भयो । अहिले बार्सिलोना स्पेनी ला लिगाको दोस्रो स्थानमा छ र उसले सिजनको अन्त्य यही स्थानमा गर्ने निश्चित जस्तै देखिएको छ ।

गज्जब नै हो यो, होइन् र ? बार्सिलोनाका लागि यसबीच लगातार राम्रो खेलिरहेका एक खेलाडीमा पर्छन्, तिनै डेम्बेला । फरक के भने ज्याभी आउन अगाडि चारैतर्फ हल्ला फैलिएको थियो, यी खेलाडीले ढिलो चाँडो बार्सिलोना छाड्ने छन् । छाड्ने मात्र होइन्, उनले त बार्सिलोनालाई चुना लगाएर जाने छन् । त्यस्तो किन भन्दा उनको बार्सिलोनासँगको अनुबन्ध यसै सिजन सकिने छ र उनी विना कुनै मूल्य अन्यत्र जान सक्छन्, यस्तोमा बार्सिलोलाई घाटा हुने भयो नै ।

तर स्थिति वास्तवमै केही फेरिएको छ र बार्सिलोनालाई विश्वास छ, उनी यही क्लबमा बस्नेछन् । यसको कारण हो, डेम्बेलोको उत्कृष्ट प्रदर्शन नै । बार्सिलोनाले सेल्टा भिगोमाथि प्राप्त जितमा पनि सबैभन्दा राम्रो प्रदर्शन गर्ने खेलाडी रहे, डेम्बेला । सेल्टा भिगोविरुद्ध गोलको खाता खोल्ने पनि यिनै खेलाडी थिए । तर अहिले तत्काल उनको चर्चा गर्न लागेको भने उनको गोलको अवसर सिर्जना गर्ने प्रदर्शनका लागि हो, त्यसो भनेको उनी अहिले गज्जबका ‘एसिस्ट–म्यान’ भएका छन् ।

ला लिगामा यस सिजन कोही खेलाडीले सबैभन्दा बढी ‘एसिस्ट’ निकालेका छन् भने ती उनी नै हुन् । बार्सिलोनाका यी विन्गरले सेल्टा भिगोविरुद्धको खेलपछि सर्वाधिक ‘एसिस्ट’ निकाल्ने क्रममा रियल म्याड्रिडका करिम बेन्जेमालाई उछिनेका छन् । डेम्बेलाले सेल्टा भिगोविरुद्धको खेलपछि ‘एसिस्ट’ बनाइसेकेका छन्, बेन्जेमाको नाममा खालि ११ मात्र ‘एसिस्ट’ छ । जोर्डी अल्बाले भने अहिलेसम्म १० ‘एसिस्ट’ को प्रदर्शन गरेका छन् ।

यहाँनिर उल्लेखनीय पक्ष के पनि छ भने डेम्बेलोले बेन्जेमाको तुलनामा १० खेल कम खेलेका छन् । चोटका कारण उनले लिगका सुरुआती १३ खेल खेलेनन् । अनि नयाँ अनुबन्ध गर्न इच्छा नदेखाएपछि क्लबसँग उनको किचकिच पनि चलिरह्यो । छोटो भूमिकामै मात्र सीमित रहे ।  प्रशिक्षकमा ज्याभी आएपछि भने उनी फेरिए । अब त उनी पहिलो रोजाईका खेलाडी भएका छन् । उनी त अब बार्सिलोनाको पुर्नजागरणको पर्याय जस्तै पनि भएका छन् ।

प्रश्न भने कायम नै छ, के उनले बार्सिलोनासँग नयाँ अनुबन्ध गर्ने छन् त ? ज्याभी आएयता अनुबन्धबारे कुराकानी पनि चलिरहेको छ र यसको गम्भीर रूप लिएका पनि एक महिना जति नै भयो । बार्सिलोनामा उनको भविश्यलाई लिएर पक्कै पनि अझै प्रश्न कायम नै छ । तर त्यस अगाडि उनले आफ्नो उपयोगिता भने मज्जाले सावित गरेका छन् । अनि यसको फाइदा भएको भनेको बार्सिलोनालाई नै त हो । डेम्बेला अब वास्तवमै अद्धितीय ‘एसिस्ट–म्यान’ भएका छन् ।
–मार्काको सहयोगमा ।