एजेन्सी । पोर्चुगल र मोरक्कोबीचको खेलको कुरा गर्नु अघि, इतिहासतिर फर्कौ । सन् १९८६ को विश्वकप । खेल समूह चरणको थियो । सो खेलमा मोरक्कोले पोर्चुगललाई ३–१ ले हराएको थियो । संयोग मान्नुपर्छ, विश्वकपमा मोरक्कोको त्यो पहिलो जित थियो । अनि कुनैपनि अफ्रिकी मुलुकसँग पोर्चुगलको त्यो पहिलो हार ।
समय धेरै बितिसकेको छ । तर पोर्चुगल र मोरक्कोको कुरा गर्दा यो खेलको नतिजासमेत सामुन्ने आउने गर्छ । सायद सोही नतिजाले मोरक्कोले टोलीलाई उत्साहित बनाएको हुनपर्छ । जसले रुसी विश्वकपको समुह चरणको दोस्रो खेलमा पोर्चुगललाई प्रतिद्वन्द्वीको रुपमा पाएको छ ।
समूह चरणको पहिलो खेलमा भोगेको पराजयले मोरक्को दबाबमा छ । स्पेनसँग ३–३ गोलको बराबरी खेलेको पोर्चुगललाई क्रिस्टियानो रोनाल्डोको फर्मले केही उत्साहित बनाएको हुनपर्छ । करियरकै उत्कृष्ट फर्ममा रहेका रोनाल्डोले पहिलो खेलमै ह्याट्रिक गर्दै पोर्चुगललाई उपाधिको दाबेदारको रुपमा प्रस्तुत गरिसकेका छन् ।
युरोकपको च्याम्पियनको हैसियतमा विश्वकप खेल्न आएकाले पोर्चुगलसँग डराउनुपर्ने कारण समेत छ । पछिल्ला तीन संस्करणको विश्वकपमा गोल गरेका रोनाल्डोले रुसी विश्वकपमा समेत अमिट छाप छाड्ने संकेत गरिसकेका छन् ।
पोर्चुगललाई फर्ममा रहेका खेलाडीबाट उत्कृष्ट खेलाडी मैदान उतार्न पाउने सुविधा छ । उसले ब्रुनो अलभासको स्थानमा जोस फन्टेलाई मौका दिन सक्नेछ ।
मोरक्कोलाई चोट बोेकेका खेलाडीले सताउन सक्नेछ । ईरानविरुद्धको खेलमा चोट बोकेका राईट ब्याक नोर्दिन अम्राबात पोर्चुगलविरुद्धको खेलमा नरहने पक्का छ । नियमित राईट डिफेन्स नाबिल डिरर घुडाँको चोटका कारण आजको खेल गुमाउन सक्ने सम्भावना छ ।
पोर्चुगलले सन् २००२ यता गैर युरोपेली मुलुकसँग हारेको छैन । यता मोरक्को ६८ प्रतिशत बल नियन्त्रणमा राख्दा समेत ईरानसँग १–० ले हारेको थियो । त्यसैले स्कोरिङमा देखिएको समस्या पोर्चुगलविरुद्धको खेलमा दोहोरिए मोरक्कोको अघिल्लो चरण प्रवेशको सम्भावना लगभग सकिनेछ ।
-1746200987.jpg)
