काठमाडौं । जति बेला लिभरपुलका प्रशिक्षक योगर्न क्लोपलाई यस सिजन चार उपाधि जित्ने सम्भावनाबारे बताइन्छ, उनी प्रतिक्रियामा मीठो हाँसो दिने गर्छन् । तर उनले पनि कम्तीमा के मानेका छन् भने अहिलेसम्म जति समय लिभरपुलको जिम्मा पाइएको छ, त्यसमध्ये अहिलेको टिम नै सबैभन्दा बलियो हो । उनले यत्तिको भन्न सक्नु पछाडिको कारण हो, कोलम्बियाली विन्गर लुइस डिजायको आगमन । उनी आएपछि सिजनको दोस्रो भागमा लिभरपुलको आक्रमण अझ बलियो भएको छ ।
गत साता मात्र लिभरपुलले पेनाल्टीमा चेल्सीलाई हराएर लिगकप जितेको थियो, त्यो पनि १० वर्षको प्रतीक्षापछि । जति बेला आज मंगलबार राति लिभरपुलले एनफिल्डमा इन्टर मिलानको सामना गर्नेछ, यो मर्सिसाइड क्लब युरोपेली च्याम्पियन्स लिगको क्वाटरफाइनल प्रवेशका लागि बलियो प्रत्यासी रहने छ । अन्तिम १६ को पहिलो खेलमा लिभरपुल २–० ले अगाडि छ । धेरै खेलाडी फेरिएको टिमले पनि हालै एफएकपको क्वाटरफाइनल यात्रा गरिसकेको छ, त्यो पनि सजिलै ।
इंग्लिस प्रिमियर लिगमा लिभरपुल अहिले लगातार सात खेलको जित यात्रामा छ र म्यानचेस्टर सिटीलाई उपाधि होडमा बलियो टक्कर दिइरहेको छ । धेरैको विश्वास थियो, जनवरीमा लिभरपुल कमजोर हुनु पर्ने थियो, जति बेला मोहम्मद सलाह र साडियो माने अफ्रिकी कप अफ नेसन्स खेल्न क्यामरुन गएका थिए । तर पोर्टोबाट डियाज आएपछि त्यस्तो समस्या केही भएन् । क्लोप लिभरपुल आएयता टिमको सफलता धेरै सलाह, माने र ब्राजिली रोबर्टो फिरमिनोमा टिकेको थियो ।
अहिले यी तीनै खेलाडी ३० वर्ष माथिका हुने क्रममा छन् र तीनैको क्लबसँगको अनुबन्ध अर्को सिजन सकिंदैछ । क्लोप मान्छन्, त्यसै त हो, लिभरपुललाई नयाँ र युवा खेलाडी चाहिएको । लिभरपुल अहिले कति स्तरमा धनी छ भने १७ गोल गरिसकेका डिएगो जोटालाई पनि वेञ्चमा राख्न सकिन्छ । यो सबैको कारण हो, तीन साता अगाडि सानसिरोमा लिभरपुलले दुई गोलको जित निकालेको । इन्टरलाई यो नतिजा एनफिल्डमा पल्टाउन पक्कै सजिलो हुने छैन्, खालि असम्भव भन्न मात्र नसकिने हो ।
आजै राति अर्को अन्तिम १६ को दोस्रो लेगमा बायर्न म्युनिखले आफ्नो घरमा रेडबुल साल्सबर्गको सामना गर्नेछ । यो खेल १–१ को बराबरीमा छ, त्यसैले सबै प्रकारका सम्भावना खुल्ला छ । सम्भवत: एलिनाज एरिनामा हुने खेलमा बायर्न नै क्वाटरफाइनल प्रवेशका लागि बलियो प्रत्यासी रहनेछ, तर उसको ध्यान यस खेलमा मात्र छैन्, आफ्ना पोलिस फरवार्ड रोबर्ट लेवनडोस्कीमा पनि छ । यी जादुयी खेलाडीले बायर्नसँग नयाँ अनुबन्ध गर्न आनाकानी गरिरहेको छ ।
त्यसमाथि लेवनडोस्की आफैले पछिल्ला तीन खेलमा कुनै गोल गरेका छैनन्, जुन उनी जत्तिको खेलाडीका लागि अस्वभाविक हो । विशेषत: म्यानचेस्टर युनाइटेडले उनीमाथि बलियो रूचि देखाइरहेको छ । लेवनडोस्की ३३ वर्षका भए । त्यति मात्र होइन्, बायर्नका गोलरक्षक म्यानुएल नोया ३६ र थोमस मुलर ३२ वर्षका भए । यी तीनै खेलाडीको अनुबन्ध अर्को सिजन सकिनेछ । नोया र मुलरले त कुरैकुरामा बायर्नमै रहने भनिसकेका छन्, तर लेवनडोस्कीले यस्तो भनेका पनि छैनन् ।
अबको सिजन उनी कहाँ हुनेछन्, त्यसको अन्तिम निर्णय उनमै रहने निश्चित छ । लेवनडोस्की जत्तिको खेलाडीलाई गुमाउनु भनेको बायर्नको प्रतिष्ठामा आँच आउनु पनि हो, जुन जर्मन च्याम्पियनका लागि सह्य हुने छैन् । त्यसैले साल्सबर्गविरुद्धको खेल आफैमा उसका लागि गाह्रो छ, क्वाटरफाइनल पुग्न सफल रहेपनि त्यसपछिको यात्रा सजिलो हुने छैन् । त्यसैले हुन सक्छ, बायर्नको ध्यान अहिले अर्कैतिर छ, च्याम्पियन्स लिगमा भन्दा पनि ।
–एएफपीको सहयोगमा
