विवाह बन्धनमा बाँधिए फुटबलर विशाल राई
इलाम । राष्ट्रिय फुटबल टोलीका मिडफिल्डर विशाल राई वैवाहिक बन्धनमा बाँधिएका छन् ।
झापाका राईले इलामकी रविना गुरुङलाई दुलही बनाएका हुन् ।
झापाको अर्जुनधारा नगरपालिका ११ कमलधापका विशाल र इलामको सन्दकपुर गाउपालिका ४ माबुकी रविना झन्डै चार वर्षदेखि प्रेम सम्बन्धमा रहेका थिए ।
फागुन ४ गते विशालको तर्फबाट रविनाको घरमा गएर मागेर ल्याइएको थियो ।
विशालका अनुसार शुक्रबार राई परम्परा अनुसार विवाह भएको हो र पछि गुरुङ परम्परा अनुसार विवाह हुनेछ ।
काठमाडौँको दशरथ रंगशालामा मछिन्द्रले लगातार दोस्रोपटक लिगको उपाधि रक्षा गरेका दिन विशाल भने रविनलाई लिन झापाबाट इलाम पुगेका थिए ।
झापा फर्कने क्रममा क्लबले उपाधि जितेको जानकारी पाएको विशालले बताए ।
विशाल लगातार चौथोपटक लिग च्याम्पियन टोलीको सदस्य बनेका छन् ।
मछिन्द्रबाट लगातार दुईपटक लिग जित्नुअघि उनले त्यही सफलता मनाङ मस्र्याङ्दी क्लबबाट पनि प्राप्त गरेका थिए ।
सन् २०१५ मा राष्ट्रिय टोलीमा परेयता उनले पछाडि फर्किएर हेर्नु परेको छैन ।
२०१५ देखि २०२२ सम्मको यात्रामा उनले ३४ क्याप जित्दै ४ अन्तर्राष्ट्रिय गोल गरेका छन् ।
२०१५ मा भारतको पुनेबाट डेब्यु गरेका विशालले माल्दिभ्स, फिलिपिन्स र बंगलादेशविरुद्ध गोल गरिसकेका छन् ।
बुवा जागिरमान र आमा सावित्राका २९ वर्षे विशाल एक्ला छोरा हुन् ।
