राष्ट्रिय महिला लिगको दोस्रो चरण विराटनगरमा 

काठमाडौं । राष्ट्रिय महिला लिग फुटबल प्रतियोगिताको दोस्रो चरण विराटनगरमा हुने भएको छ । 

अखिल नेपाल फुटबल संघ (एन्फा) र विराटनगर महानगरपालिकाबीच बिहीबार लिगको दोस्रो चरण विराटनगरमा गर्ने सम्झौता भएको हो । 

एन्फा अध्यक्ष कर्मा छिरिङ र विराटनगर महानगरपालिकाका मेयर भिम पराजुलीले सम्झौतापत्रमा हस्ताक्षर गरे ।

सम्झौता अनुसार विराटनगर महानगरपालिकाले लिगका शीर्ष ५ टिम तथा प्लयेयर अफ द म्याच विजेता खेलाडीलाई ४५ लाख रुपैया प्रदान गर्ने छ । 

दोस्रो चरणका खेलहरु विराटनगरको सहिद रंगशालामा हुनेछ । 

लिगको पहिलो चरण भने चैतमा चितवनमा हुनेछ । 

पहिलो चरणका लागि एन्फा र भरतपुर महानगरपालिकबीच सम्झौता भइसकेको छ । 

पहिलो चरणको खेलहरू नगरको ७ र १९ वडाको मैदानमा हुनेछ ।

महिला लिगमा ८ टिमको सहभागिता रहनेछ । 

लिगमा एपीएफ क्लब, त्रिभुवन आर्मी क्लब, नेपाल पुलिस क्लब, विराटनगर महानगरपालिका, वालिङ नगरपालिका, चन्द्रपुर नगरपालिका, धनगढी उपमहानगरपालिका र ललितपुर महानगरपालिकाको सहभागिता रहने छ ।

धनगढी र ललितपुर उपमेयर कप राष्ट्रिय महिला लिग छनौट प्रतियोगिताबाट राष्ट्रिय लिगका लागि छनोट भएको हो।

छनौटमा धनगढी च्याम्पियन बनेको थियो भने ललितपुर उपविजेता बनेको थियो ।