राष्ट्रिय महिला लिगको पहिलो चरण चितवनमा

 काठमाडौं । राष्ट्रिय महिला लिग फुटबल प्रतियोगिताको पहिलो चरण चितवनमा हुने भएको छ ।

अखिल नेपाल फुटबल संघ (एन्फा) ले लिगको पहिलो चरण चितवनमा चैतको दोस्रो साता आयोजना हुने जनाएको छ ।

एन्फाले पहिलो चरणको लिगका लागि भरतपुर महानगरपालिकासँग सम्झौता गरेको छ ।

एन्फाका अध्यक्ष कर्मा छिरिङ शेर्पा र भरतपुरका मेयर रेणु दाहालबीच सम्झौता पत्रमा हस्ताक्षर भएको छ।

सम्झौता अनुसार मैदानको मर्मत सम्भार र व्यवस्थापनको खर्च भरतपुर महानगरपालिकाले व्यहोर्ने छ ।

पहिलो चरणको खेलहरू नगरको ७ र १९ वडाको मैदानमा हुनेछ ।

महिला लिगमा ८ टिमको सहभागिता रहनेछ । 

लिगमा एपीएफ क्लब, त्रिभुवन आर्मी क्लब, नेपाल पुलिस क्लब, विराटनगर महानगरपालिका, वालिङ नगरपालिका, चन्द्रपुर नगरपालिका, धनगढी उपमहानगरपालिका र ललितपुर महानगरपालिकाको सहभागिता रहने छ ।

धनगढी र ललितपुर उपमेयर कप राष्ट्रिय महिला लिग छनौट प्रतियोगिताबाट राष्ट्रिय लिगका लागि छनोट भएको हो।

छनौटमा धनगढी च्याम्पियन बनेको थियो भने ललितपुर उपविजेता बनेको थियो ।