काठमाडौं । कतार एयरवेज सहिद स्मारक 'ए' डिभिजन लिग फुटबलमा फ्रेन्ड्स क्लबले पहिलो जित निकालेको छ ।
शुक्रबार भएको खेलमा ब्रिगेड ब्वाइज क्लबलाई ५-२ गोल अन्तरले हराउँदै फ्रेन्ड्सले पहिलो जित निकालेको हो ।
फ्रेन्ड्सको पहिलो जितमा सुशील शाह र जमउल एन्थोनी फ्रान्सिओसले दुई-दुई गोल गरे । श्याम बाबु केप्छ्याकीले एक गोल थपे ।
ब्रिगेडका ड्याडी जुनियर वाम्बा र अनिल गुरुङले एक एक गोल फर्काए ।
जितपछि फ्रेन्ड्समा मुख्य प्रशिक्षक मृगेन्द्र मिश्र खुशी देखिए । उनले महत्वपूर्ण खेलमा जित निकाल्न सफल भएको बताए ।
'आजको खेल गर या मर जस्तो थियो । आज खेल हाम्रा लागि कोभिडको पहिलो डोज जस्तै भयो । अझै दोस्रो र तेस्रो डोज लगाउन बाँकी छ,' उनले भने, 'खेल जित्नै पर्ने थियो, जित्यौं । अझै दुई खेल जित्नै छ।'
प्रशिक्षक मिश्रले रेलिगेसनबाट जोगिन अझै जित आवश्यक रहेको बताए ।
'हामी बुस्टर डोजसम्म लगाउछौ । अझै हामीलाई गाह्रो छ । सुरक्षितका लागि तीन खेल जित्नै पर्ने छ,' उनले भने ।
ब्रिगेडका मुख्य प्रशिक्षक सनोज श्रेष्ठले टिमले सिजनकै खराब खेल खेलेको बताए ।
'ब्रिगेडको सिजनकै खराब खेल हो । हामीपनि रेलिगेसन क्षेत्रमै थियौं । यो हारले अझै रेलिगेसन क्षेत्रमै पुग्यौं । दोस्रो गोल अफसाइड जस्तो थियो,' उनले भने, 'त्यो गोलनै खेलको टर्निङ पोइन्ट जस्तो भयो । आज जितेको भए, केही सहज हुने थियो ।'
प्रशिक्षक श्रेष्ठले अब टिमलाई गार्हो रहेको समेत बताए ।
'अर्को खेल च्यासलसँग छ । च्यासल पनि रेलिगेसनमा छ । अब निकै गाह्रो छ,' उनले भने ।
