काठमाडौं । राष्ट्रिय फुटबल टोली र अफ्रिकी राष्ट्र मरिससविरुद्ध दुई मैत्रीपूर्ण खेल अन्तर्गत पहिलो खेल शनिबार दशरथ रंगशालामा सम्पन्न भयो । घरेलु मैदानमा राष्ट्रिय टोलीले इतिहासमै पहिलोपटक अफ्रिकन राष्ट्रबिरुद्ध १–० को जित निकाल्न सफल रह्यो ।
फरवार्ड बिमल घर्तीमगरको गोलमा नेपालले मरिससविरुद्धको पहिलो अन्तर्राष्ट्रिय मैत्रीपुर्ण खेलमा जित हात पार्यो ।
तत्कालिन प्रशिक्षक योहन कालिनको प्रशिक्षकत्वमा अनुशासनको कारबाही र त्यसपछि चोटबाट फर्किएका हुन्, बिमल । नयाँ प्रशिक्षक अब्दुल्लाह अल्मुताइरीको विश्वासलाई जित्दै राष्ट्रिय टोलीमा पूनरागमन गरेको बिमलले पहिलो खेलमै गोल गर्न सफल भए ।
उसो त जारी लिगमा बिमलले पुनरागमनको संकेत दिईसकेका थिए । जब राष्ट्रिय टोलीबाट उनी मैदानमा उत्रिदै गोल गरे, त्यसपछि उनलाई मात्र हैन सिंगो नेपाली फुटबललाई भाबुक बनायो ।
उनले सन् २०१८ मा भएको साफ च्याम्पियनसिपपछि राष्ट्रिय टोलीबाट पहिलो गोल गरेका हुन् । दोस्रो हाफको ५५ औं मिनेटमा गोल गर्दै विमलले राष्ट्रिय जर्सीबाट गोल संख्या ९ पुर्याएका छन् । बिमलको लागि यो खेल जति अविस्मरणिय बन्यो, त्यातिनै प्रशिक्षक आल्मुताइरीका लागि पनि रह्यो ।
उनलाई नेपालको सर्बाधिक सफल प्रशिक्षक मानिन्छ । अन्तत उनै अल्मुताइरीको प्रशिक्षकत्वमा नेपालले एक दशकपछि मैत्रीपूर्ण खेलमा जित निकाल्यो । दशरथ रंगशालामा आफ्नो पहिलो जितको खुसियाली उनले मनाए ।
खेलको पृष्ठभुमी : अक्टोबर १६ मा साफको फाइनलमा पराजित भएपछि नेपाल पहिलो पटक घरेलु मैदानमा अफ्रिकन राष्ट्रबिरुद्ध उत्रिएको हो । करिब एक दशक भन्दा बढी समय नेपालले मैत्रीपूर्ण खेलमा भोग्दै आएको पिडालाई बिर्सिने अवसर खोजिरहेको थियो । पछिल्लो समयमा बलिया टोलीबिरुद्ध गरेको राम्रो प्रदर्शन, साफको फाइनल खेलेको, प्रशिक्षकको फरक प्रशिक्षण शैलीले पाएको आत्मविश्वास लगायतका तथ्यले नेपाली टोलीलाई बलियो मानिएको थियो ।
त्यसैले पनि खेलअघि मरिससका प्रशिक्षक टोनी फ्रान्कोइसले नेपाली फुटबल टोलीको मुक्तकण्ठले प्रशंसा गरेका थिए । किनकी माल्दिभ्स भ्रमणमा नेपालले देखाएको प्रदर्शनबाट उनी प्रभावित थिए । त्यसैले उनको अनुमान थियो, खेल निकै प्रतिस्पर्धात्मंक हुनेछ ।
हिन्द महासागरको सुन्दर द्धिप दक्षिणपूर्वी अफ्रिकन राष्ट्र मरिसस अफ्रिकन फुटबलको इतिहाससंगै अघि बढ्दै आइरहेको छ । यद्धपी विभिन्न कारणले एकसमय जुन साख थियो, त्यो भने उसले पछिल्लो समय गुमाएको छ ।
एकपटक अफ्रिका कप अफ नेसन्समा सहभागिता जनाएको मरिसस नेपालबिरुद्धको खेलका लागि करिब डेढ महिना अभ्यास गरेर हिमालयतर्फको यात्रामा निस्किएको थियो । अन्तराष्ट्रिय फुटबलका लागि उसले दुई वर्षसम्म पर्खिनु पर्यो ।
म्याच 'विल्डअप' र कोण :
५५ औं मिनेटमा अन्जन विष्टको पासमा अफसाइड ट्रयापलाई रिड गर्दै बिमलको लो भली प्रहार गोलमा परिणत हुनु अघि खेलको पहिलो हापÞmमा भने खास केहि देख्न पाइएको थिएन । त्यसअघि लगातार प्रयास भए तर दुवै टोली फिनिसिङमा चुकेका थिए । नेपालले पहिलो हाफमा ५ वटा प्रहार गरेको थियो, मरिससले ६ प्रहार । त्यसमा नेपालको मात्र एक प्रहार अन टार्गेट थियो, मरिससको ५ प्रहार ।
रोहित चन्द, पुजन उपरकोटी, अनन्त तामाङ जस्ता अनुभवी खेलाडीको अनुपस्थितीमा नेपालले पहिलो हाफमा दबाब झेल्यो । शारिरीक रुपमा बलियो देखिएको मरिससको टोलीले पहिलो हाफमा ‘हाइ लाइन’ मेन्टेन गरेर ४–३–३ को रणनीतिमा उत्रिएको नेपाललाई केहि हदसम्म आक्रमण बुन्ननै दिएन । जब फुलब्याक सुमन अझै ‘वाइड’ गएर ‘बाइ लाइन’सम्म पुगे, त्यो बेला केहि क्रसहरु सफल पनि भयो । त्यसैले नेपालले ४ वटा कर्नर पहिलो हाफमा प्राप्त गर्यो ।
खेलको सुरुवातमा भने नेपालले मोमेन्टम बनाएको थियो । दोस्रो मिनेटमा लिगमा मनाङ्गबिरुद्ध प्रभावशाली फ्रिकिक गोल गरेका सुनिल बलको फ्रिकिक मरिसियन डिफेन्डर योनाथन स्पेभिलेबाट डिफ्लेक्ट हुँदै बाहिरियो । त्यसपछि फरवार्ड अन्जन विष्टको प्रहारलाई मरिससका कप्तान केभिन जित लुइसले सहजै बचाए । केहि मुभ दुवै टिमले सिर्जना गरेपनि मरिससको लागि सबै भन्दा राम्रो अवसर ३६ औं मिनेटमा आएको थियो । एड्रिएन फ्रान्कोइसको वान भर्सेस वानको प्रहारलाई गोलरक्षक तथा नेपालका कप्तान किरण चेम्जोङले बचाए । फर्नान्डो ज्याक्सनको प्रहार पोलमा लागेर फर्कदा मरिसस दुर्भाग्यशाली रह्यो।
मिस पास र फरवार्डमा बारम्बार अन्जनले मौकाको सदुपयोग नगर्दा नेपालले अग्रता लिन सकिरहेको थिएन । पछिल्लो समय नेपालका लागि लगातार गोल गरिरहेका अन्जनले दोस्रो हाफमा गोलको लागि असिस्ट भने सानदार दिए । दोस्रो हाफमा केहि रक्षात्मक देखिएको मरिससले नेपाली दर्शकको हुटिङ सामु दबाब महशुश गरेको देखिन्थ्यो ।
जुन शारीरिक खेल उसले देखाएको थियो, त्यसमा गल्ती गर्न पुग्यो । ४–४–२ को फर्मेसनमा रक्षात्मक बनेको मरिससले ‘मुभ बिल्ड़प’ गर्न खोज्दा मिडफिल्डमा मेर्बिन जोसेलिनले बल पोजेसन गुमाउन पुगे । लगत्तै मार्क गरिरहेका अन्जनले बल स्टिल गर्दै ‘डेप्थ’सम्म पास निकाले । बिमल खाली रहेको अवस्था थियो, डिफेन्डर जियान्लिअससंग रिकभर गर्न कुनै मौका थिएन । तत्काल बिमलले 'लेफ्ट फुटेट' हाफ भली सट प्रहार गर्दै गोल गर्न सफल रहे, जुन निर्णयाक पनि रह्यो।
जुन स्तर र अवस्था दुवै टोलीको भिन्नता थियो, त्यो अनुरुपको प्रदर्शन नेपालले भने गर्न सकेन । नेपालले धेरै अवसर गुमायो । फिनिसिंगमा चुस्त देखिएन । ८० औं मिनेटमा पनि दुई जना खेलाडीले हेडर क्रसरोड पत्ता लगाए पनि अग्रता दोब्बर बनाउन असफल रहे ।
केही थकित र परिवर्तित अवस्थाबाट गुज्रिरहेको मरिससविरुद्ध पहिलो खेलमा संघर्षपूर्ण रहे पनि नेपालले केहि सकारात्मक संकेत भेटेको छ । दुई जना खेलाडीले डेब्यु गर्ने अवसर पाए, आगामी दिनमा उनीहरुले कस्तो प्रदर्शन गर्छन्, हेर्नुपर्नेछ ।
विशेष गरेर सुदिप गुरुङले लिगमा राम्रो सम्भावना देखाएका थिए । सुमन अर्याल अझै आक्रमक बनेका छन्, देबेन्द्र तामांग ‘कम्पोज्ड’ देखिए, तेज धारिलो छन् । शनिबारको खेलमा नेपालले प्राप्त गरेको जित र बिमल घर्तिमगर लयमा देखिनुनै महत्वपुर्ण हो ।
