काठमाडौं । विराट कोहली आधुनिक क्रिकेटका त्यस्ता पात्र हुन्, जसले आफूलाई निकै जिद्दी प्रतिस्पर्धात्मक खेलाडीका रूपमा प्रस्तुत गरे । उनी प्रत्येक रनका लागि खुबै मिहिनेत गर्थे, विपक्षी टिमलाई प्रत्येक पक्षबाट परास्त गर्न चाहन्थे । फिल्डिङ गर्दा खुबै जोसिला हुन्थे । उनलाई मन नपराउने हो भने त्यसका लागि धेरै कारण बन्छन् । यिनै कोहलीले भारतीय टेस्ट टिमको पनि कप्तानी छाडेका छन् । यस्तोमा उनका आलोचकले पनि सोध्ने प्रश्न हो, किन त ?
दक्षिण अफ्रिकाविरुद्धको तीन टेस्टको शृंखलामा भारत २–१ ले पराजित भएपछि कोहलीले कप्तानी छाड्ने निर्णय अगाडि आएको हो । यो टेस्ट सुरु हुन अगाडि सबैले भनिरहेका थिए, यसमा भारत सजिलै विजयी हुनेछ, तर नतिजा रह्यो, उल्टो । शृंखलाको सुरुआत नै खराब रह्यो, किनभने दक्षिण अफ्रिका उड्न अगाडि कोहलीले एउटा त्यस्तो पत्रकार सम्मेलन गरेका थिए, जसले अन्तत: विवादको चर्को रूप लियो र यो लगभग भारतीय क्रिकेट बोर्डका अध्यक्ष शौरभ गांगुलीतर्फ इंगित थियो ।
त्यस पत्रकार सम्मेलनमा कोहलीले दाबी गरेका थिए, ट्वान्टी ट्वान्टी टिमको कप्तानी छोड्ने उनको निर्णयबारे पुर्नविचार गर्न गांगुलीले अनुरोध गरेका थिए । जबकी गांगुली यस्तो मान्दैनन् । पछि कोहलीको हातबाट वान डे टिमको कप्तानी पनि छिनियो, अब उनी आफैले टेस्ट टिमको कप्तानी छाडेका छन् । बोर्डले कोहलीसँग टेस्ट टिमको कप्तानी छाड्न भन्न सक्ने स्थिति पनि थिएन् । तर कोहली पनि कम्तीका थिएनन्, आफैले कडा निर्णय गरे ।
तर पछिल्लो समय कोहलीको ब्याटिङलाई लिएर पनि प्रश्न भने उठन थालेको थियो । विशेषत: भारतको मध्यक्रमको ब्याटिङ निकै फितलो सावित भइरहेको थियो र उनी त्यसकै एक भाग थिए । उनले ३० अन्तर्राष्ट्रिय इनिङ्सयता शतक बनाउन सकेका थिएनन्, जुन आफैमा अविश्वसनीय हो । मध्यक्रमका अर्का दुई ब्याट्सम्यान चेतेश्वर पुजारा र अजिन्के रहाने पनि उत्तिकै खराव लयबाट गुज्रिरहेका छन् । त्यसको दबाब कोहलीमाथि पनि परेको छ ।
फेरि पछिल्लो समय कोहली र भारतीय क्रिकेट बोर्ड तथा यसका अध्यक्ष गांगुलीबीच राम्रो सम्बन्ध पनि चलिरहेको छैन् । बोर्डका यसअघिका अध्यक्ष भारतीय क्रिकेटमा त्यति छाउने गरेका थिएनन्, जति गांगुली छाउने गरेका छन् । उनी आफै भारतीय टिमका पूर्व कप्तान हुन् र आफ्नो खेलाडी जीवनका बेला उनी कोहली जत्तिकै थिए, जिद्दी खालका । जति बेला यस्ता समान दुई व्यक्तित्वको टक्कर हुन्छ, केही न केही त हुन्छ नै, जसरी अहिले भारतीय क्रिकेटमा भएको छ ।
सायद केही हदसम्म कप्तानीको बोझले कोहलीलाई समस्यामा पार्न थालेको थियो । भनिन्छ पनि क्रिकेटमा कप्तानी गर्नु जत्तिको गाह्रो केही हुन्न । यो खुबै दबाब झेल्नु पर्ने काम हो । यही बोझले खेलाडीको व्यक्तिगत प्रदर्शनमा पनि असर पर्छ । भलै कोहली यसलाई मान्न तयार हुने छैनन्, तर यो हो पनि । कप्तानी छाडेपछि पनि भारतीय क्रिकेट टिममा उनको उपस्थिति भने कसैले काट्ने सक्ने छैन् । उनी उम्दा खेलाडी हुने, यसमा कसैको शंका छैन् ।
अनि एउटा तथ्य के पनि निश्चित छ, जुन कसैले पनि काट्न सक्दैन र त्यो हो, कोहलीको नेतृत्वमा भारतले टेस्ट क्रिकेटमा गरेको शानदार प्रदर्शन । उनको नेतृत्वमा भारतले ६८ टेस्ट खेलेकोमा ४० मा जित निस्केको थियो । यो कम्ती ठूलो उपलब्धी होइन् । यी ६८ टेस्टमध्ये भारत १७ मा बराबरीमा रोकियो भने ११ मा पराजित पनि रह्यो । उनलाई भारतका टेस्ट क्रिकेट कप्तानमध्ये सबैभन्दा सफल मान्ने पनि उत्तिकै छन् । यस्तोमा दक्षिण अफ्रिकाविरुद्धको एक शृंखलामा असफल हुँदैमा किन राजीनामा दिनु पर्यो भन्ने प्रश्न त बन्छ नै ।
–इन्डियन एक्सप्रेसको सहयोगमा ।
-1749465281.jpeg)
